Erngup nukinganik Ilulissat pilersorneqaliivippoq

Erngup nukinganik nukissiorfissaq Sermersuup killinnguaniittoq, Ilulissallu illoqarfianit avannamut kangimut 50 kilometerinik ungasitsigisumiittoq, sanaartorneqarluni aallartinnerminit ukiut marluk affarlu ingerlareersut, Ilulissat illoqarfianut pilersuisinissaminut piareerluinnalerpoq:

- Erngup nukinganik nukissiuut imermik kaavitinneqartoq misiligaqqammerparput. Tullinnguupparpullu erngup nukinganik tigoraavissap Ilulissaniittup misilerarnissaa kiisalu erngup nukinganik nukissiorfiup illoqarfiup tungaanut attavii ajunnginnersut misilerartussanngorpagut. Neriuutigaarpullu ullut arlaqanngitsut qaangiuppata oqarsinnaalissasugut suut tamarmik ajunngitsut innaallagassamillu erngup nukinganik pilersitamik Ilulissanut pilersuisinnaalersugut, Ole Kristensen, Nukissiorfiit Paakitsumi erngup nukinganik sanaartornermi nakkutilliisuutitaat oqarpoq.

Erngup nukinganik nukissiorfissap sanaartorneqarnera pilersaarutaasut malillugit ingerlangaluartoq, Nukissiorfinniit neriorsuutigineqarsinnaanngilaq Iluliarmiut innaallagissamik ataavartumik piffissami siullermi pilersorneqarsinnaanerat:

- Erngup nukinganik nukissiorfiliaq atorneqalerpat, taava naatsorsuutigisariaqarparput ilaanni innaallagiaaruttoqartarsinnaanera. Tamannali sapinngisamik annikinnerpaaffianiitinniarsaraarput. Kisiannili illoqarfiup innaallagissiorfia sillimmatitut suli atorneqassaaq. Taamaattumik atuisut piffissami siullermi naammagittarnissaannik kaammattortariaqassavagut. Tamatumali kingorna ataavartumik tunioraalernissaa naatsorsuutigaarput, Ole Kristensen oqarpoq.

Paakitsumi erngup nukinganik nukissiorfiliaq sapaatip akunnerata naanerani Ilulissanut innaallagassamik pilersuilernissaa naatsorsuutigineqarpoq:

- Suut tamarmik ajunngitsumik ingerlappata – tamannalu neriuutigaarput – taava illoqarfimmut innaallagissamik sapaatip akunnerata naanerani pilersuilissagunarpugut, Ole Kristensen oqarpoq.

Paakitsumi erngup nukinganik nukissiorfissaq tamakkiisumik 2013-mi ingerlalernissaa naatsorsuutigineqarpoq.