Erinarsoqatigiit misigisassaat utaqqipput

Kujataani erinarsoqatigiit aqqanillit Qaqortumi naapisimaarnissaanni Mads Lumholt aqutsisuusussaagaluarpoq, pisinnaajunnaarmalli Janne Wind Danskiusoq nunatsinnut tikilluni erinarsoqatigiinnik ilinniartitsiartortussanngorpoq.

-Ullut siulliit erinarsoqatigiinniik aqutsisuusartut ilikkagassanik nutaanik tuniorarneqassapput. Ataasinngornermi ullup qeqqata kingorna Qaqortumut tikikkuma erinarsoqatigiit aqutsisui ataatsimoortissavakka. Taamaalillungalu qanoq aqutseriaaseqarneri paasereersimaleriarukkit qanoq pikkorissaqqinneqarsinnaaneri takusinnaalissavakka. Erinarsoqatigiit aqutsisuisa ilinniartinneqarnerminni erinarsoqatigiinnik allanik aqutsineq misilissavaat. Taamalillutik misilittakkanik nutaanik peqarlutik erinarsoqatigiinnut aqutsisutut ingerlaqqissinnaanngussapput, Janne Wind Det Danske Musikkonservartoriumimmi ilinniarsimasoq taama oqaluttuarpoq.

Erinarsoqatigiit aqutsisuisa Janne Windimik pikkorissarneqarlutik ilinniartinneqareernerisa kingorna aaqqissuussap erinarsoqatigiit ataatsimoorlutik erinarsoqatigiinnerannik naggaserluarneqarnissaa neriuutigineqarpoq.

- Pingasunngornermiit sapaatip akunnerata sinnera ilanngullugu erinarsoqatigiinni erinarsortartut sulisinneqassapput. Erinarsoqatigiit kisimiillutik ilaatigullu erinarsoqatigiit aqqanillit ataatsimoorlutik suliaqartinneqartassallutik. Siunertaraara erinarsoqatigiit pikkorissarnerup kingorna pissarsiaqarluarlutik angerlarsinnaanissaat. Erinarsornerminni aqutseriaatsit assigiinngitsut, erinarsuutit nutaat ilikkagassaasa ilagissagaat qularinngilara. Pingaarnerpaavorli nuannisaqatigiilluarnissaq, taamaalillunimi ilinniarnissaq namminermi piumaarmat. QIlanaareqaara Kalallit erinarsoqatigiivisa tusarnissaat, kiisalu neriuppunga Mads Lumholtimut taartaalluarlunga aaqqissuussinissaaq naammassilluarumaarlugu, Janne Wind oqaluttuarpoq.