Erik Jensenip Trump Junior naapissanngikkaa
Siullermik Erik Jensenip Donald Trump Nuummut qaaqquaa. Tamanna decembarip 27-anni pivoq. Ullualuit qaangiuttut præsidentinngortussap ernera nunatsinni illoqarfiit pingaarnersaannut tikeraalersoq nutaarsiassiarineqarpoq.
Erik Jensen Trump Juniorimik ataatsimeeqateqassanersoq ippassaq aperineqarami oqaaseqanngilaq. Taassumali præsidentip ernera ataatsimeeqatigissanagu ullumi oqaatigaa.
Siumumimi siulittaasoq aamma aningaasanut naalakkersuisuusoq Danmarkimukariartorluni KNR-imut oqarpoq.
- Pilersaaruteqanngilanga naapinnissaanut aamma aggersarneqarnikuunngilanga ilisimasaqanngilangalu suna qulequtaq allallu pillugit maaniinniarnersoq, Erik Jensen KNR-imut ullaap tungaani qulingulersoq oqarpoq.
Københavnimi ataatsimiinnissat
Erik jensenip Trump Junior ataatsimeeqatigissagaa oqaluuserineqaraluarpoq, taassumali taamaattoqassannginnerarpaa.
KNR-immi taanna Nuup mittarfiani timmisartumut ikiartulersoq naapippaa, taannalu itisiliinissaminut piffissaqanngilaq.
Taannali naalakkersuisoqatigiit sinneri peqatigalugit Københavnimukariartorli oqarpoq.
- Københavnimut ataatsimiiffissakka, pisussat pilersaarutit malillugit, qangali pilersaarutikka, taakku ingerlakkiartulerpakka, Erik Jensen oqarpoq.
Takornariaanini uppernarsaraa
Donald Trumpip timmisartua Nuummi mittarfimmut nalunaaqutaq aqqaninngunngitsiartoq mippoq, præsidentip ernera angajulleq timmisartumut ilaavoq. Taassuma inuttut nammineq akunnernik sisamanit tallimanut sivisussuseqartumik angalalluni Nuummiilluni podcastimini "Triggered with Don Jr."-imi oqaatigaa. Trump Juniorip oqarnera naapertorlugu sulisunilu angallutik inoqutinut attaveqaatinut imarisassanik suliaqariartorput.
Naalagaaffinngornissamut Nunanullu Allanut Naalakkersuisoqarfiup taassuma tikeraarnera nammineq inuttut tikeraarnerigaa nunatsinnilu naalakkersuisut isumaqatigiissuteqarfigineqarsimanngitsut tusagassiuutinut nalunaarummi allappaa.
Donald Trump Juniorip maaniinnermini naalakkersuisunik naapitsinnginnissani uppernarsarpaa.
- Naamik, naapitsissanngilagut. Tamanna pilersaarutaanngilaq. Takornariatuinnaq maaniippugut, taanna mittarfimmi KNR-imut oqarpoq.
Amerikap Kalaallit Nunaannik soqutiginninneranut atatillugu arlaannik oqaaseqarsinnaavit?
- Uanga tassunga oqaaseqarsinnaanngilanga. Allat tassunga tunngatillugu oqaaseqassapput, taanna oqarpoq.
Naalakkersuisut siulittaasuat, Múte B. Egede naak Donald Trump Jr. tikeraaraluartoq Danmarkiliarluni ullumi aamma aallarpoq.
Nunarsuarmi ajortunut illersuutissaq
Trumpip siullermik præsidentiunermini USA-p Kalaallit Nunaat pisiarissagaa 2019-imi aggustimi siunnersuutigaa.
Siunnersuulli tamanna ministeriunermit, Mette Frederiksenimit (S) itigartitsissutigineqapallappoq. Oqallinneq “isumaqanngilluinnartutut” taamani taavaa.
Mette Frederiksenip oqaaseqaataa ”oqaaseqaasipalaarsuusoq” Trump kingusinnerusukkut allappoq.
Ukiut tallimat sinnerlugit matuma siorna taamaattoqarpoq, Trumpillu nunarput maanna oqaluusereqqilerpaa.
Ken Howerymik Danmarkimi aallartitamik saqqummiinerminut atatillugu decembarimi siullermik oqaluuserinneqqippoq.
- Nunarsuaq tamakkerlugu eqqissineqassappat, USA-p Kalaallit Nunaat oqartussaaffigisariaqarpaa, Trump allappoq.
Donald Trumpip Kalaallit Nunaat inoqutinut attaveqaatitigut, Truth Socialikkut oqaluusereqqippaa: Ernera Don Dr. Aamma sinniisut assigiinngitsut nuna tupinnartoq soqutiginartorlu tikeraassavaat.
-Kalaallit Nunaat pikkunartorsuuvoq, nunamilu inuiaat iluaqutigissavaatigut. Nunarsuarmi amiilaarnartunik eqqarsarsinnaasoqarmat, uagut paarissavarput, Trump allappoq.
Naggasiutigalugulu "Make Greenland Great Again" allallugu.
