Naak taamaatitsiinnarnissamik nalunaaruteqartoqareeraluartoq Múte B. Egede Danmarkiliassasoq
USA-mi oqartussat nunatsinnik soqutiginninnerat oqallisaaleruttortoq naalakkersuisut siulittaasuat Múte B. Egede Kunngi Frederimmik Amalienborgimi naapeqateqarnissamik taamaatitsiinnarpoq.
Taammaakkaluartoq suli Danmarkiliarusuppoq.
Naalagaaffinngornissamut Nunanullu allanut Naalakkersuisoqarfimmi pisortaq Mininnguaq Kleist nutaarsiassaqartitsivimmut Berlingskemut taama oqarpoq.
Ukiumut nutaamut isernitsinnut atatillugu ilassinninnermi Københavnimi sisamanngorpat pisussami Múte B. Egede kalaallit sinnerlugit oqalugiassasoq Mininnguaq Kleistip aviisi aqqutigalugu uppernarsarpaa.
Múte B. Egede ullorsiummi ataqatigiissaarinissamik pikkorinnerusariaqartutut nipeqarluni ataasinngornermi oqaraluarpoq.
- Piffissamik atuilluarnerunissamut tunngassuteqarpoq. Itinerusumik oqaasertalernagu, Ritzaumut allappoq.
Ataatsimiinnissaq aqagu pingasunngornerup ullaavani pilersaarutaasoq, tikeraarnissaa allanik anguniakkanik imaqartoq erserpoq.
Angalanissamut pilersaaarutaa Donald Trump Jr.-ip Nuummut ullumi marlunngornermi tikinnissaa toraarmagu oqallisaangaatsialerpoq.
Angalaneq politikkimut attuumassuteqannginneraallutik oqalukkaluartut Kalaallit Nunaanni inuiaat illersornissaanik kiisalu oqartussaaqataalernissamik utikajaarisoqarpoq.
