Erik Jensen Trumpimut qaaqqusineq pillugu: Paasinerlunneqarpunga
Amerikamiut præsidentianut qinersisoqarnerata kingorna Donald Trump juullimut aqaguttoq siullermik nalunaaruteqarpoq.
- Nunami sillimaniarneq nunarsuarmilu kiffaanngissuseqarneq eqqarsaatigalugit USA-p Kalaallit Nunaannik piginninnissaa aqutsinissaalu pingaaruteqarluinnartoq, Donald Trump tusagassiisarfimmini, Truth Socialikkut allappoq.
Præsidentinngortussaq ullumikkumut sanilliullugu akerlilerneqangaatsianngilaq – muminganilli.
Erik Jensenimi taamani Siumumi siulittaasuusoq aamma aningaasaqarnermut akileraartarnermullu naalakkersuisuusoq isornartorsiuinani præsidentinngortussap oqaloqatiginissaa aallartinniarlugu Donald Trump oqaaseqareersorlu Nuummut qaaqquaa.
- Qanoq iliorsimasinnaagaluarnerluni kingusinaartumik isumassarsiffiuvoq. Kisianni pissutsit maannakkut ingerlareerput, Erik Jensen oqarpoq.
Erik Jensenip Donald Trump naapikkaluaruniuk qanoq pissarsiaqarfigisinnaagaluarnerlugu KNR-imut pisup aallartinneraniilli siullermeertumik oqaaseqarfigaa.
Naatsorsuutiginngisamik ineriartortoq
Erik Jensenip qaaqqusissummik nassiussineraniilli Donald Trump nunatsinnut tunngatillugu ilungersuussinerusumik oqaluuserinnittalerput. Donald Trumpip ernera Donald Trump Jr. Nuummut tikinniartoq KNR-ip januaarip arfernani saqqummiuppaa.
Taamaammat KNR-ip Erik Jensen præsidentip erneranik naapeqateqarniarnersoq aamma qaaqqusissuteqarnera ernerata tikeraarnissaanut attuumassuteqarnersoq apeqquteqarfigaa – tamannali naalakkersuisuusimasup partiillu siulittaasorisimasaata itigartitsissutigaa.
Erik Jensenip qaaqqusissuteqarnini tikeraarneranut attuumassuteqarnersoq inunnit qularutiginnittoqarnera paasisinnaavaa – atassusiisoqarneralu pakatsissutigaa.
- Qaaqqussuteqarnerup kingunitsianngua Donald Trump allaanerusumik oqaaseqarpoq. Eqqarsarnarsivorlu: "Suna!", tamannalu soorunami pakatsinarpoq. Qulequttat siunertaminit isiginiarneqarnerupput, inuilli ullutsinni taama qisuariartarput.
Erik Jensen nunarput USA-mik niueqateqarnissamut ammaffiginnissasoq suli isumaqaraluarluni Donald Trumpip oqariartuutaanut sakkortuumik akerliliivoq.
- Aamma Trump tatiginagu erseqqissaatigereerpara, oqaaserisaalu ilungersunarluinnarlutik. Taamaakkaluartorli iligisatsinnut ilaavoq. Tamannalu pakatsinarpoq.
- Iligisatsinnit, tamatuma Danmarkip ataanut saassussisoqalernera toqqissisimanngissutigaarput, uanilu uagut nunarsuarmi inissisimanerput pissutigalugu pinngitsaaliiniutitut tiguagaaqqasutulli inissisimalluta.
Illersornissamut isumaqatigiissut nutaaq
Trumpip uissuumminartumik nalunaaruteqarnera juullikkut nalaanni oqallisigineqangaatsiartoq Erik Jensenip oqaatigaa. Taamaammat USA-p toqqaannartumik suleqatigiinnissamut kissaatigisaannik oqaluuserinnissinnaasoqarnissaa pissutigalugu USA toqqaannaq oqaloqatiginissaa pitinniarlugu qaaqqunissaa pitsaanerusoraa.
Erik Jensen Danmarkip USA-llu akornanni illersornissamut isumaqatigiissut qanoq ataqatigiinnersoq paasisaqarfiginerulersinnaassallugu periarfissamik takunnippoq.
- Illersornissamut 1951-imeersumik isumaqatigiissuteqarnera pineqarpoq. Aningaasaqarnikkut sinaakkutit sunniutaalu ilisimasaqarfiginngilagut – taakkulu pillugit danskit naalakkersuisuinit ilisimatitsissutigineqanngisaannarput. Taamaammat saaffiginnissutigisara tamatuma angunissaanut tikisittariaqarlutigu siunertaavoq, Erik Jensen oqarpoq.
Danmarkip USA-p Pituffik Space Basemiinnera iluanaarutigingaatsiartaraa nunatsinni politikkikkut suliaqarnermi tusatsiagaajuartoq innersuussutigaa.
Erik Jensenip oqaaserisai KNR-ip Dansk Institut for Internationale Studierimi Issittumi sillimaniarneq ukkataralugu ilisimatusartuunermut, Ulrik Pram Gadimut saqqummiuppai.
Ilisimasatit naapertorlugit Danmarkip USA-mut illersornissamut isumaqatigiissut USA-mut Pituffimmiissinnaatitsisoq aningaasatigut iluanaarutigisaraa tusatsiakkat ilumoortortaqarsinnaaneranut takussutissaqarpa?
- Naamik, Ulrik Pram Gad tassuuguinnaq akivoq.
Naalli immikkut ilisimasallip tusatsiakkat ilumoorsinnaaneri takorloorsinnaanngikkaluarai, Erik Jensenip tamanna suli erseqqissartikkusuppaa.
- Tamanna pingaaruteqarluinnarpoq, namminerlu aningaasatigut nammassinnaalernissarput anguniagaraarput. Pituffik pillugu isumaqatigiissut qanoq aningaasartaqartiginersoq tusatsiagarpassuaqarpugut. Illersornissamut isumaqatigiissut aammalu tamanna nunatta iluanaaruteqarfigissagaa siunertaralugit decembarimi nalunaaruteqarpunga. Tamanna iluanaaruteqarfigivallaanngikkipput isumaqarpunga, Erik Jensen oqarpoq.
