Erik Jensen isumaqatigiinniarnerit iluatsinngitsut pillugit: Tupaallaatiginngilarput
Erik Jensenip Inuit Ataqatigiit Siumumik suleqateqarnissaminnik ippassaq qujaannarnerat tupaallaatigivallaanngilaa.
- Qinersisoqanngitsorli kikkut isumaqatigiillutillu ataqatigiinnersut takusinnaareerparput. Taamaammat tupaallanngilagut, illuatungiliuttuunissatsinnullu piareersimavugut, Erik Jensen KNR-imut oqarpoq.
Inatsisartuni atuuffiit 31-upput.
Partii naalakkersuisoqatigiilluunniit amerlanerussuteqassagunik 16-inik atuuffeqassapput.
Inuit Ataqatigiit 12-inik qinigaatitaqarput.
Siumut qulit.
Demokraatit pingasut.
Naleraq sisamat.
Atassut marlunnik qinigaatitaqarpoq.
Nunatta Qitornai Suleqatigiissitsisullu Inatsisartunut qinigaatitaqanngillat.
Dermed forhandler Inuit Ataqatigiit nu kun med Atassut og Naleraq. Demokraatit forlod forhandlingerne allerede i fredags.
Siumut peqataatillugu eqqissisimasoqarnavianngitsoq
Inuit Ataqatigiit taamaalillutik Atassut Nalerarlu kisimik maanna isumaqatiginialerpaat. Demokraatit isumaqatigiinniarnerit tallimanngormalli anereerput.
- Sunniuteqarnissatta annikinnerulernissaa soorunami uggornarpoq. Kisianni tusaatissatut tiguarput, Erik Jensen oqarpoq.
Inuit Ataqatigiit siulittaasuata Múte B. Egedep ”pajaatsunik” naalakkersuisoqatigeeqarnissaa kissaatigalugu Siumut naalakkersuisoqatigerusunngilaa.
IA-p siulittaasua patajaattunik ukiunilu sisamani atasussanik naalakkersuisoqatigiiliorusulluni oqarpoq. Siumullu naalakkersuisoqatappata, naalakkersuisut patajaannavianngitsut, Múte B. Egede oqarpoq.
- Eqqissisimasoqarnissaa kissaatigaarput. Siumullu naalakkersuisoqatigiinni peqataaneratigut taamaattoqarnavianngitsoq isigivarput, Múte B. Egede oqarpoq.
- Isumaliuteqareerpugut – isumaqatigiinniarnerulli tullianut ingerlaqqinnissatsinnut Siumut peqataassanngitsoq isumaqatigiinniarnermili aqutsisutut nalilerpara.
Inatsisartuni inisssititerinermik apriilip ulluisa 23-anni tallimanngornermi katersuuttoqassaaq.
Ataatsimiinnermi Naalakkersuisunut ilaasortat nutaat pisortatigoortumik akuerineqassapput. Inatsisartuni ataatsimiititialianut, aalajangiisartunut siunnersuisoqatigiinnillu ilaasortat aamma aalajangerneqassapput.
Qinersinermi inernerit. Tigusiffik: valg.gl
Inuit Ataqatigiit siulittaasuata naalakkersuisoqatigiit nutaat apriilip ulluisa 15-iata missaani – tassa imaappoq sisamanngorpat missaani saqqummiutissavai.
IA-p Atassut Nalerarlu ulluni tulliuttuni isumaqatiginiassagai, Múte B. Egede oqarpoq.
Naleqqap siulittaasua, Hans Enoksen qilanaalereerpoq:
- Oqaloqatigiinnissanut allanut piffissami matumani qaaqquneqanngilagut. Kisianni ataatsimiigiaqquneqaqqinnissamut neriuuteqarpugut, Naleqqap siulittaasua oqarpoq.
Qinikkat sisamat amigaataasut
Naleqqallu qaaqquneqaqqinnissaa ilimanarluinnarpoq. IA Inatsisartuni aqqaneq-marlunnik qinigaatitaqarpoq. Naalakkersuisoqatigiit amerlanerussuteqarnissamut 16-iussapput.
Taamaammat Múte B. Egede ikinnerpaamik sisamanik suleqatissarsissaaq.
Naleraq sisamarluinnarnik qinigaatitaqarpoq. Nalerarlu IA-tulli Kuannersuarni aatsitassarsiornissamut suliniummut, tassa aatsitassanik qaqutigoortunik piiaanermi aamma uranitalinnik piiaanermut akerliusuuvoq.
AAMMA ATUARUK Siumut Inuit Ataqatigiinnut isumaqatigiinniarnernit peqataajunnaartoq
Atassutip aatsitassarsiornissamik suliniut juunip ulluisa aallaqqaataata tungaanut tusarniaassutigineqartoq innuttaasunut taasititsissutigerusuppaa.
Inuit Ataqatigiit qinersinermi 36 procentinit taaguunneqarluni partiini anginerpaanngorpoq.
Naleraq 12 procentinik taaguunneqarpoq, Atassullu 7 procentinit.
Siumut 29 procentinit taaguunneqarpoq.
