Erik Jensen Hammond pillugu: Nukiit tamaasa atorfissaqartippagut
Nunatta namminiilivinnissaanut aqqummi Siumumi nukiit tamaasa pisariaqartinneqarput.
Taamaammat partiip siulersuisuisa parteeqatitoqartik Aleqa Hammond uteqqikkusunnginnersoq aperisimagaat, Siumup siulittaasua, Erik Jensen oqarpoq.
Aleqa Hammonds økonomisager:
- Aleqa Hammond Grønlandsbankenimi kontumini aningaasaateqarani akiliummik katillugit 5.100 koruuninik 90-ikkunni atuisimavoq. Taassuma akiliissutini matoqqasoq qaammatini marlunni atorlugu akiliissutigisarsimavaa. Tassa kortini matuneqareersoq Hotel Godthåbimi sippuilluni atorsinnaasimavaa.
Aleqa Hammondip pisut politiinut nassuerutigai 1996-imilu unnerluutigineqarluni. Suliarli Berlingsip saqqummiineranitigut tamanit 2013-imi aatsaat ilisimaneqalerpoq.
- 2008-imi Aleqa Hammond Aningaasaqarnermut nunanullu allanut tunngasunut Naalakkersuisuunermi nalaani, aalakoorluni akiligassaq akilernagu taxaniit qimaasimammat, Nuummi Politiinut unnerluunneqarpoq. Suliarli kingorna annerulersinneqarani matuneqarpoq.
- 2013-imi Aleqa Hammond Naalakkersuisut siulittaasunngutsiareerluni pisortat aningaasaataanik atortarsimasoq kukkunersiuinermut ataatsimiititaliap paasivaa. Aleqa Hammond 204.000 koruuninik Namminersorlutik Oqartussat aningaasaataanik atuisimavoq. Kukkunersiuisullu arlaleriarlutik akileeqqusisareersut, Aleqa Hammondip 2014-imi aningaasat Nunatta karsianut utertippai.
Nunatta karsianit tigusisimanerup kingorna Aleqa Hammond ukiup aappaa avillugu Naalakkersuisunut siulittaasooreerluni tunuarpoq, kinguninngualu nutaamik inatsisartunut qinersisoqarluni.
- Aleqa Hammondip Folketingimi ilaasortaanerminut atatillugu kreditkorterisani atorlugu 13.000 koruunit nalinginut imminut pisiortorsimasivoq, e-mailimi Ekstra Bladep saqqummiussaani tamanna atuarneqarsinnaavoq.
Hammondip allaffissornermi paatsooqatigiittoqarsimaneranik aallaqqaammut nassuiaatigigaluarpaa. Nassuiaateqarninili kingorna utertillugu. Suliaq taanna Siumumit ilaasortaajunnaarneranik kinguneqarpoq.
- Naalagaaffinngornissatsinnut nukiit tamaasa ataatsimoortinnissaat siunertaralugu katersornissaat pingaartillugu taamatut saaffiginnissuteqarsimavugut.
Erik Jensenip oqarnera naapertorlugu Aleqa Hammond Siumup siunissami pisariaqartissinnaasaanik piginnaasaqarluarpoq.
- Uani nukik pigineqartoq ilaatigut tassaavoq, kinaassutsitsinnut tunngassuteqartut, naalagaaffinngornissatsinnut tunngassuteqartut taavalu aamma alloriarnerit tullii annertuut tigunissaanut nukimmik pigisaqartoqarpoq, siulittaasoq oqarpoq.
Aleqa Hammondip partiimut uteqqinnerminik ippassaq nalunaaruteqarnera tamanut tupaallaatigineqarpoq. Taannami nunatsinni politikkikkut ilungersunartunik iliuuseqarnikuuvoq.
Pisortat aningaasaataannik atornerluineq
Aleqa Hammond Namminersorlutik Oqartussat aningaasaataannik imminut tunngassuteqartunut atuisimanera pillugu suliaqartoqareersoq, Naalakkersuisut siulittaasuatut 2014-imi tunuarpoq.
Ukiup tullissaani Siumut sinnerlugu folketingimut qinigassanngortippoq, qinigaallunilu, tassanili Hammond pillugu ajutoorutaasumik suliaqartoqaqqippoq. Tamatumuuna Folketingimit akiliummik atornerluineq pineqarpoq.
Siumulli maanna siulittaasuata politikerip misilittagaqartup politikkikkut sulinera pisoqarfiusoq ajornartoqartinngilaa:
- Uagut isumaqarsimavugut tamakku pisimasut aallaavigalugit ingerlaqqittoqarsimasoq, aammalu tutsuiginassuseq annertooq pigineqalersimasoq. Taamaalilluta Siumup naleqartitaanik naammassinninnissamik piumassuseqartoqartoq aammalu taakkuninnga malinninniartoqartoq, Siumup siulittaasua oqarpoq.
- Tassa unneqqarissuseq maligassiuisuunissarlu, aamma naleqartitatta ilagilluinnagaat, taakkua naammassineqarnissaat aamma isumaqatigiissutigaagut. Taakkulu Siumup anguniagai malittarisassaalu aamma Aleqap ilisimaarilluarpai.
AAMMA ATUARUK Siumumi siulersuisuunerit Aleqa Hammond tikilluaqqugaat
- Taakkulu aallaavigalugit soorunami sulinerput ingerlattussaavarput, taannalu aamma tunuliaqqutseeqataaffigilluassagaa qularutiginngilara, Erik Jensen oqarpoq.
Aleqa Hammond Folketingimi qinigaaffiup kingorna Nunatta Qitornai sinnerlugit nunatsinni 2018-imi qinersinermi sassarpoq.
Tassanili isernissamut naammattunik taaguunneqanngilaq, parteeqataatali, Vittus Qujaukitsup naalakkersuisunngornermi kingorna sulinngiffeqarniarnerani paarlaalluni.
KNR-ip pineqartoq apersorniaraluarpaa, Aleqa Hammondili apersorneqarusunngilaq.