Aalisarnermut ingeniørinngorsinnaalernissaq Erik Jensip nuannaarutigaa
- Nunarsuarmioqatitsinnut imminut nittarsaassinnaanerput pitsaanerulersinniarlugu taamaalilluta qulakkeersinnaavarput, Erik Jensen oqarpoq.
Ilinnialersussat aalisarnermi piniutitigut atortorissaarutit, aalisakkanik piujuartitsiniarnermik tunngaveqartumik aalisartarnissap qulakkeerinneqataasussanik sammisaqarnerit, aalisakkanik qalerualinnillu tunisassiornermi ingerlatseriaatsit kiisalu aalisarnermi aqutsineq aammalu nutaaliornernut periarfissarsioriaatsit immikkut ilisimaqarfigilissavaat, nunatsinnullu tamanna isumaqartorujussuuvoq, Aalisarnermut Naalakkersuisoq, Erik Jensen oqarpoq.
- Isumaqarpunga pitsaasorujussuusoq, taava taamalilluta ilinniartunik maani nunatsinni pigisaqalerutta taava siunissami aamma taamatut qaffasissumik taama ilinniarsimasut nammineq avataaninngaannit tikioraatitsiunnaarluta nammineq immitsinnut pilersorsinnaanissatsinnut aqqutissiuisuummat tamakkiisumik tapersersorparput, Erik Jensen oqarpoq.
Taassumalu upperaa atorfiit maanna allamiunit nunaqavissunit taarserneqarsinnaanerat.
- Taakkua atorfilittat assigiinngitsut taarsersorneqarnissaat nunaqavissunit taanna tassani siunertaammat taamaattoq naalakkersuisuninngaanniit isumalluarfigaarput.
Erik Jensen oqarpoq.
AAMMA ATUARUK Aalisarnermut ingeniørinngortoqarsinnaalerpoq
Danskit naalagaaffianit aningaasalersorneqassaaq Namminersorlutik oqartussanit tapiiffigineqarluni. Ilinniarfiullu Sisimiuni Artekimi inissinneqarnera nunatta nittarsaanneqarneranut isumaqartorujussuuvoq.
- Tulluusimaarutigissavarput nunatsinni imminut pilersorsinnaanerput, kiisalu aamma ilinniarfimmik internationalimik taaneqarsinnaasumik massakkut peqalersinnaanerput, Erik Jensen oqarpoq nangillunilu.
- Taava taamaalilluta nunarsuarmioqatitsinnut assigiinngitsutigut imminut nittarsaassinnaanerput pitsaanerulersinniarlugu nammineq nunaqavissunik ilinniartoqarsinnaanerput taamalillugu qulakkeerniaratsigu.
Aalisarnermut Naalakkersuisoq Erik Jensen oqarpoq.
Ilinniartut 25-it nunatsinniit Danmarkimiillu Artekimi Sisimiuni septemberimi ilinniarneq aallartissinnaalerpaat.
Sisimiuni aalisarnermut ingeniøri ilinniarneqqarsinnaalissaaq. Pinngortitaleriffik taama nalunaarpoq.
