Erik Jensen Aslak Jensenip eqqartuussaareernerani: Eqqartuussivimmi suliareqqinneqarnissaa utaqqivarput
Aslak Jensenip Nunatta Eqqartuussisuuneqarfianut suliassanngortitseqqiinera Siumut Partiiani utaqqineqarpoq. Siumut partiiani siulittaasoq Erik Jensen Aslak Jensenip partiimi ilaasortaaginnarnissaata aalajangiiffigineqarnissaa pillugu taama oqarpoq.
Aslak Jensen partiimi ilaasortaajunnaarsinneqarsinnaanera Siumut partiiani immikkoortortaqarfiit aalajangigassarigaat, siulittaasoq oqarpoq.
- Siumuminngaanniit ilaasortaajunnaartitsisoqassappat, tamakkua malittarisassat malillugit ingerlanneqartarput. Taannalu immikkoortortaqarfiit peqataatinnerisigut suleriaatsillu allat malillugit ingerlanneqareersimatillugit aatsaat ingerlanneqartarpoq, Siumut partiiani siulittaasoq Erik Jensen KNR-imut oqarpoq.
Eqqartuussisoqarfik Sermersuumi eqqartuussineq
Aslak Jensen ukioq 2017-imi marsip ulluisa 17-ianni inunnik isumaginnermik suliaqartumut toqutsinissamik sioorasaarisimasutut eqqartuunneqarpoq.
Pinerluttulernermut inatsit paragraf 37 naapertorlugu pisortat suliffeqarfiutaannut eqqunngitsuliorsimasutut eqqartuunneqarpoq.
Aslak Jensen Eqqartuussiveqarfik Sermersuumi eqqartuunneqarnermini pinngitsuunerarpoq, ullunili 20-ni pineqaatissinneqarsimasunut inissiisarfimmiittussanngorlugu ataasinngormat eqqartuunneqarpoq.
Aslak Jensen inatsisinik unioqqutitseqqikkuni ulluni 20-ni pineqaatissinneqarsimasunut inissiisarfimmiittussanngorlugu eqqartuunneqarpoq.
Tamatuma kingorna Aslak Jensen aalajangerpoq, suliaq Nunatta Eqqartuussisuuneqarfianut suliassanngorteqqinniarlugu.
- Taavalu inuttaata ajugaanissani naatsorsuutigalugu Nunatta Eqqartuussisuuneqarfianut aamma ingerlateqqippaa. Taanna soorunami naalaassavarput. Aamma taanna aallaavigalugu tusaatissatut tigunikuuarput, inuttaata aalajangernera ataqqeqqissaarlutigu, Erik Jensen oqarpoq.
AAMMA ATUARUK Aslak Jensen Inatsisartunit sulinngiffeqarniartoq
Taamaattumik Aslak Jensen Siumumit anisitaasinnaanera pillugu oqallittoqarnissaa Erik Jensenip kissaatiginngilaa.
- Taanna annerusumik oqaaseqarfigisinnaanngilara. Aamma kikkut ilaasortanngussanersut kikkullu anisitaassanersut pillugit oqallinnissaq massakkut inissaminiinngitsoq isumaqarpunga. Taanna Siumumi ilutsinni eqqartortarparput, aamma malittarisassagut maleqqissaarlugit iluamik ingerlasarput, Erik Jensen taama oqarpoq.
- Aslak Jensenip eqqartuussivimmi pineqaatissinneqarnera partii siulittaasuattut qanoq tiguiuk?
- Sulisut illersorneqartussaammata, taamatut aalajangertoqarsimanera eqqartuussiviullu aalajangernera ataqqillutigu suliaq taama inerneqartipparput, Erik Jensen oqarpoq.
AAMMA ATUARUK Siumumi politikerip eqqartuussaanera: Pinerluuteqaqqissaguni ulluni 20-ni pineqaatissinneqarsimasunut inissiisarfimmiissasoq
Aslak Jensenip illersuisua Finn Meinel KNR-imut oqarpoq, Nunatta Eqqartuussisuuneqarfiani pinngitsuutinneqarnissaa imaluunniit pineqatissiissutip sakkukinnerulersinnissaa piumasariniarlugu.
Aslak Jensen Inatsisartunut siorna apriilimi qinersinermi 814-init taaguunneqarluni Siumumit taaguunneqarnerpaat pingajoraat. Aamma Inatsisartut aalisarnermut, piniarnermut nunalerinermullu ataatsimiititaliaanni siulittaasumut tullersortaavoq.
