Aslak Jensen Inatsisartunit sulinngiffeqarniartoq
Inatsisartunut ilaasortap Aslak W. Jensenip eqqartuussinerup inernera tassa pinerluuteqaqqissaguni ulluni 20-ni pineqaatissinneqarsimasut inissiisarfianniittussanngortinneqarnissani Nunatta Eqqartuussisuuneqarfianut suliassanngortippaa. Tamatuma saniatigut suliap naammassinissaata tungaanut Inatsisartunit sulinngiffeqarallarumavoq.
Siumut tusagassiuutinut nalunaarummi allappoq.
AAMMA ATUARUK Siumumi politikerip eqqartuussaanera: Pinerluuteqaqqissaguni ulluni 20-ni pineqaatissinneqarsimasunut inissiisarfimmiissasoq
Aslak Jensen Inatsisatuni inatsisiliornermik suliaqarnermut akornusersuiniarnani Inatsisartunit sulinngiffeqarnissaminik qinnuteqartoq nalunaarummi allassimavoq:
- Taamak kissaateqarsimavunga, isumaqarama uannut tunngassuteqartut Inatsisartut sulinerannut akornusersuissanngitsut. Eqqartuussivitsigut uannut tunngasumik suliaqartoqartillugu pissusissamisoornerutippara, suliap naammassineqavinnissaata tungaanut sulinngiffeqarallaruma.
- Neriuppunga nunap eqqartuussisuuneqarfiani suliaq ingerlaqqippat pinngitsuutinneqassallunga, taamallu siunertaqarlunga suliamik ingerlatitseqqissimavunga, Aslak Jensen oqarpoq.
Siumup aalajangerneq tusaatissatut tigugaa
- Eqqartuussiviup aaliangernera ataqqillugu aamma Aslak W. Jensenilu oqaloqatigiilluareerluta tamanut pitsaanerpaamik aaqqiissuteqartoqarpoq. Taamaattumik Aslakip aaliangernera Siumumi tusaatissatut tiguarput ataqqeqqissaarlutigulu, Siumup siulittaasua Erik Jensen nalunaarummi oqarpoq.
Suliaq naatsumik
Aslak Jensen Kommuneqarfik Sermersuup inunnik isumaginnittoqarfianut 2017-imi martsip 17-iani nalunaaqutaq 12:45-p missaani sianerluni isumaginninnermik suliaqartumut toqutsinissamik siorasaaruteqarsimasutut unnerluutigineqarpoq. Pinerluttuliornermut inatsimmi pisortani suliffeqartumut tunngasumik paragraf 37-mik unioqqutitsisimasutut unnerluutigineqarpoq.
Eqqartuussivimmi suliaq kommunip Aslak Jensenip ilaqutaanut tunngatillugu aalajangiuteqarsimaneranik tunngassuteqarpoq.
Aslak Jensen Eqqartuussisoqarfik Sermersuumi pinngitsuunerarpoq, tassanili pinerluuteqaqqissaguni ulluni 20-ni pineqaatissinneqarsimasunut inissiisarfimmiittussanngortinneqarpoq. Eqqartuussut pissutigalugu Aslak Jensen inatsisinik unioqqutitsisumik iliuuseqaqqissaguni ulluni 20-ni pineqaatissinneqarsimasunut inissiisarfimmiittussanngortinneqarpoq. Taassumali suliaq Nunatta Eqqartuussisuuneqarfianut maanna suliassanngortippaa.
Aslak Jensen Inatsisartunut qinersinermi 814-init taaguunneqarluni Siumumit taaguunneqarnerpaamut pingajuuvoq. Aslak Jensen Inatsisartut aalisarnermut piniarnermullu ataatsimiititaliaani maannamut siulittaasuuvoq.
