Erfalasorput Herstedvesterimi amuaat

- Herstedvesterimi parnaarussat aneersinneqarmata Erfalasorput amuneqaqqaarnera persuasiorpalaartumik ingerlanneqarpoq. Taamatullu aaqqissuussineq parnaarussivimmi inspektøriusup Hans Jørgen Engbo-p isumassarsiarivaa:

- Naak parnaarussivitsinni qallunaat kalaallillu tamarmik immikkoortortaqarfeqaraluartut qallunaat erfalasuinnaat kisimi amuneqartarnera naapertuilluartuusorinnginnakku erfalasulerfik aapperparput. Taamaammat sapaatit akunnialunnguit matuma siorna Kalaallit Nunaanniinnera iluatsillugu maani parnaarussivitsinni atugassatsinnik kalaallit erfalasuannik pisillunga. Hans Jørgen Engbo oqarpoq, imalu nangilluni:

- Kalaallit erfalasuat qangali amusimasussaangaluaripput nalunngilara, taamaamamt erfalasorsiara ukiunik 26-nik pisoqaassuseqarpoq, erfalasumillu amuseqqaarnerput iluatsillugu oqalugiarama ima oqarpunga: Naak kingusinaaraluarluta erfalasoq maanna amusinnaanngorparput, taamaattumik maanna amusinnaagatsigu qujanaqaaq. Hans Jørgen Engbo oqarpoq.

Erfalasuliinerlumi kalaallit parnaarussat nuannaarutigaat:

Kalaallit parnaarussat oqaaseqartartuat kinaassutsiminik isertuusserusuttoq Radioaviisimut taama oqaluttuarpoq. Erfalasorput amuneqalermat parnaarussaq Henning Maqe amusisussatut parnaarussivimmit toqqarneqartoq oqalugiatsiarpoq. Taassuma isumaa malillugu Kalaallit inuiattut ullorsioraangamik sulinngiffeqartarnissaanik noqqaassuteqarniariartoq parnaarussiviup inspektøriata Hans Jørgen Engbop ingerlaannaq akorpaa, aappaagulu inuiattut ullorsiortoqaqqilerpat parnaarussat kalaallit tamarmik qaqortumaassaanik pisiniunniarlugit neriorsuutigalugu.

Herstedvesterimi kalaallini parnaarussat siullerpaartaat 1958-imili parnaarunneqarpoq. Piffissamillu killilersugaanngitsumik nunatsinniit inissiisarneq 1979-imi atugaalermalli ukiuni 33-ni atugaasimalluni.