Eqqumiitsuliat takussutissatut atorniarneqalerput

Canadami peqqinnissamut isumakkeerinninnissamullu ataatsimiititaliaq Canadami tamarmi tusarniaavoq Indianerit Inuillu atuarfinni ineqarfiutigisuni atornerlunneqarsimanertik pillugu oqaluttuarsinnaasut tusaaniarlugit.

Canadami peqqinnissamut isumakkeerinninnissamullu ataatsimiititaliaq nuna tamakkerlugu tusarniaavoq Indianerit Inuillu ilaquttaminnit peersinneqaramik atuarfinnullu nerisaqarfiutigisunut aallartinneqaramik atornerlunneqarnermik nalaataqartarsimanerat tusarniarlugu. Taakkunannga amerlaqisut atuarfinni nerisaqarfiutigisuni taakkunani, naaggaartut katuullilluunniit ilagiivini siulersuisunit Canadap naalakkersuisui peqatigalugit, eqqarsartaatsimikkut kinguaassiuutimikkullu atornerlunneqartarsimapput.

Ataatsimiititaliap taakkua 'annattuusutut' imminnut taagortut sunik oqaluttuassaqarnersut tusarumavai, tusarnaarnissamulli periaatsit amerlaqalutik. Indianerit Inuillu ilaannut atornerlunneqarnerup oqaluuserinissaa ajornakusoorpallaarpoq, taamaattumillu ataatsimiititaliap titartakkat, qalipakkat, nipilersuutit, assit eqqumiitsulialluunniit allat atornerluinermik takutitsisut maanna aamma atornialerlugit.

Marie Wilson ataatsimiititaliami ilaasortaq CBC Newsimut oqarpoq:

- suliassarput tassaavoq taakkua atornerlunneqarnerannit eqqaamasat oqaluttuallu katersussallugit. Indianerit Inuillu misigissutsitik isummatillu aninniaraangamikkik tamatigut eqqumiitsuliat atortarpaat, taamaalillunilu pissusissamisoorluinnarpoq kulturilu eqqarsaatigalugu isornartoqarani eqqumiitsuliat tusarniaanerit ilaattut akuersaassagutsigik, Marie Wilson oqarpoq.

Peqqinnissamut isumakkeerinninnissamullu ataatsimiititaliap siunertaraa 'annattuusutut' imminnut taagortuni eqqarsartaatsikkut ajoqusiinerit ajorunnaarsinniassallugit, soorlu atornerluineq pillugu oqaluttuarisaanikkut takussutissiornikkut.

Eqqumiitsuliat katersugaatinut piujuartussanut ilanngunneqarumaarput.