Eqqumiitsuliat inuinnaat suliaat
Atuarfinni ukiaanerani atuanngiffeqarnermi meeqqat inersimasullu eqqumiitsuliornerup silarsuaani namminneq eqqumiitsuliortutut suliaqarlutik misiliisinnaassapput. Tamannalu Nuuk Centerimi pisussaq, Susanne Jensenip Naja Kleist Stotchillu piffissaq sivisooq atorlugu piareersaateqarfigaat.
- Eqqumiitsulianik suliaqartitsinissatsinni aalajangiussimavarput atortut atoreernikut atorlugit suliaqartitsiniarluta, assigiinngitsunimmi katersereersimavugut. Maanilu aamma pisiniarfissarsuarmi sanasut atortuisa sinnerinik pissarsisinnaanissarput qularnanngilaq. Ukiaaneranilu atuanngiffeqarnissaq nalleriarpat suliaqarnissatsinnut piariissaagut. Eqqumiitsuliortussallu takkuttussat suleqatigalugit tamatta eqqumiitsuliortutut sulissaagut, Susanne Jensen ulluinnarni assilialiorluni eqqumiitsuiornermik ilinniarfimmi aqutsisuusoq taama oqaluttuarpoq.
Naja Kleist Storch taama suliaqarnissamik isumasarsisuuvoq, isumassarsiarlu Susanne Jensen peqatigalugu ineriartortsinneqarluni. Suleqatigiilluarnermikkullu suliassamut tunngatillugu aningaasateqarfik Sermeq-mit tapiissutinik tunineqarsimapput.
- Sermeq Fondemit 4.500 koruninik tapiiffigineqarpugut, mannalu aningaasaateqarfinnut assigiinngitsunut qinnuteqartaqattaarluta. Eqqumiitsuliornermimi suliaqarnissaq akeqarpoq, neriuutigaarpullu aningaasat atorneqartussat sinneri tassa 50.000 koruunit pissarsiariumaarlugit. Taamaalillutalu inunnut eqqumiitsiliornermik suliaqartitsinissarput piviusunngortissinnaassavarput. Nuannissaqaaq inuit naliginnaasumik eqqumiitsuliornermik suliaqanngitsut eqqumiitsuliornerup silarsuaani suliaqartut takullugit. Eqqumiitsuliat tamarmik pisiniarfissarsuami pinnersaatitut atorneqartussat Nuuk Centerimut tunniunneqassapput, Naja Kleist Storch, pisiniarfissarsuarmi aamma pisiniarfiuteqartussaq taama oqaluttuarpoq.
