'Eqqortut nersornaatisipput'

Nersornaasigaasut Makkak Kleist aamma Frederik Kristensen "Kunngi" Leif Immanuelsenip immikkut pilluaqquai, oqarluni taakkua nersornaasigaanerat  immikkut akuerineqarnermik isigineqarsinnaasoq:

- Uanga namminerpiaq torragisorujuuara taanna  inuiattut ullorsiornitsinni taamatut kulturikkut suliniuteqarluarsimasunik nersornaasiisarneq. Ataqqinassusaat inuiattut ullorsiornermi tassani ittarami, Leif Immanuelsen oqarpoq.

Nersornaasigaasullu aappaa Frederik Kristensen "Kunngi" oqarpoq, nersornaasigaanini imminerminut kisimi tunngassuteqanngitsoq.

- Suliannik saqqummiisarninnut inuiaqatigiit aamma isumassarsiffifisarakkit, soorlu ippassaq oqarnittuut. Taamatut nersorneqarneq inuiaqatigiit aamma nersorneqaatigaat, taamaattumik inuiaqatigiit tapersersuinerat aamma qujanarpoq, Frederik Kristensen oqarpoq.

Nersornaasigaaneq sumut qanorlu atorneqarsinnaava?

 - Eqqarsarpunga taama pineqarneq kusanartigisoq pillugu anginerusumik qalipaaneq misilittariaqarlugu, maannakkut qalipaagaangama anginerpaaq 1 meteri missaaniittarpoq. taakkuninngaanniit anginerusumik qalipaanissara eqqarsaatigilerpara, Frederik Kristensen "Kunngi" oqarpoq.

Leif Immanuelsenillu nunatsinni eqqumiitsuliornerup siunissaa eqqarsaatigalugu isumalluarpoq:

- Inuusuttortatta eqqumiitsuliornermik arlaatigut suliaqarusullugik saqqummillattaasarnerat, tannartaa neriunarluartutut isigisariaqarmat. Taamaattumik siunissami eqqumiitsuliornerup silarsuaata uummaariinnarnissaa qularutissaanngilaq, Leif Immanuelsen oqarpoq.