Eqqillit pinnguaataat Inuit pinnguaataannik GM-eqarnermi nuannarineqarnerpaapput

Stick-bullertoqarnerani angutit marluk qisuk amitsukujooq atorlugu ajugaaniuttarput, nukittuneqqusaallutik.

Hen-gamesini inuit sisamat/sisamat unammisarput, unammisatillu uumasut pissusilersuutaat nipaallu atorlugit paatsiveerussartarpaat, neriuutigalugu akeqqatik ima paatsiveerutsigissasut, aarnguaq assamminni sorlermiinnersoq eqqoriarsinnaanagu. Holdit eqqortunik amerlanerpaanik akisut, unamminermi ajugaasuusarput.

Inuit pinnguaataannik nuna tamakkerlugu pissartanngorniunnermi indiaanerit pinnguaataat maannamut nuannarineqarnerpaapput:

- Pinnguaatit taakku isiginnaartut nuannarineqarpavaat, aaqqissuisut ilaat, Bolethe Stenskov, unnersiorpoq.

Eqittarnerit pakassumminnerillu ullumikkut aamma ingerlanneqartussaapput, qiterlerminnerillu aamma pissallutik.

One Food High Kick aamma pivoq, tassa niu ataaseq atorlugu qummut pissinneq, nissumillu ataasiinnamik tunneq, aamma One Hand Reach ingerlanneqarpoq, tassanilu itummap nateq attuumassavaa, timillu sinnera kivinneqassaaq puiseerannguarlu nivinngaavimmi nivingasoq attorniarsarineqassalluni.

Bolette Stenskovip qularutiginngilaa Inuit pinnguaataasa unammiuaarutigineqartarnerat siunissami ingerlanneqartuassasoq.

- Illoqarfiit nunaqarfiillu peqatigiiffiliortartut amerliartuinnarput, Kalaallit Nunaallu issittumi nunallit unammiuaaqatigiinneranni peqataasarmat Inuit pinnguaataannik unammiuaartarneq suli annertuiartussasoq isumaqarpunga, Bolette Stenskov oqarpoq.

Nunatsinni pissartanngorniunneq aqagu naammassissaaq.