Eqqartuussivinni oqaatsit ajornartorsiutaaqaat
Unnerluutigisaq qallunaatut paasisinnaappat oqaasiinnakkulluunniit nutserunneqarpat, Nunatsinni Politimestereqarfik unnerluussummik nutserinissamut pisussaaffeqanngitsoq, Højesteretimi aalajangiinikkut naqissuserneqarsimavoq.
- Eqqartuussuvinnut sassartut ilarpassui qallunaatut oqalussinaallutillu paasinnissinnaanersut aperigaanni angertarput. Nassuiaasussanngoraangatali ersertarpoq, apeqqutit paasiuminaatsikkaat qallunaatullu nassuiaanissaq ajornakusoortikkaat. Taamaammat isumaqarpunga, qallunaatut paasisinnaanerarluni oqarneq naammagiinnartassanngikkipput, Søren Søndergård Hansen, oqarpoq.
Unnerluutigineqartut kalaallisut allakkatigut nutserunneqarnissamik kissaateqartut immersugassamik ullumikkut immersuisarput. Kissaallu tamatigut malinneqartartoq, politimesterip tullia Morten Nielsen oqarpoq erseqqissarlugulu, politiinut saaffiginnittut nammineq oqaatsitik atorlugit sullinneqarsinnaajuaannartut.
- Unnerluussutit oqaatsit, unnerluutigisaasut paasisinnaasaat, atorlugit nalunaarutiginissaat qulakkeereertarparput, Morten Nielsen oqarpoq.
Inuit paasinninngikkaluarlutik paasinninnerartarnerannik Nunatta Eqqartuussisuuneqarfiata isumakulunnera politiit isumaqatiginngilaat.
- Inuit unnerluussutip nutserneqarnissaa kissaatigigunikku oqassaqqaarput. Aammami amerlanerpaatigut illersuisoqartarput oqaassisinnaasumik, Morten Nielsen oqarpoq.
Ingammik suliani takisuunik suliassartaqarluartunillu unnerluussutitalinni, unnerluussutip kalaallisuunngortinnissaa immikkut pisariaqartartoq Søren Søndergård Hansen oqarpoq.
- Inuit ilaat unnerluussutinik, pisimasunut assigiingitsorpassuarnut tunngasunut imalinnik nalunaarfigineqartarput. Persuttaanermut biilinilluunniit tillissimanermut tunngasuusinnaapput, suliap aappaa aappaanniit immikkoortitsinnissaq ajornakusoorsinnalluni. Taamaattoqartillugulu pingaaruteqarpoq, unnerluussutip unnerluutigineqartup paasisinnaasaanut nutserneqarsimanissaa, Søren Søndergård Hansen oqarpoq.
Kalaallit Nunaanni Eqqartuussiveqarnermut Ataatsimiititaliarsuaq inassuteqarmat, politiini oqalutsitut atorfinnik marlunnik 2001-mi pilersitsisoqarpoq. Atorfiulli aappaa allaffimmmiutut atorfittut ullumi aaqqitaavoq.
- Taanna eqqartuussivinni tupigusuutigaarput, Søren Søndergård Hansen oqarpoq.
Politiiniit ilisimatitsissutigineqarpoq, atorfiup aappaa, allanngortinneqarsimasoq, nutserisut marluk sulisinnissaannut suliassat naammanngimmata.
Kalaallit Nunaanni Eqqartuussiveqarnermut Ataatsimiititaliarsuaq isumaliutissiissummini allappoq, unnerluutigineqartup suliami susoqarneranik paasinnilluinnarnissaa pingaartuusoq. Aammali Højesteretitulli unnerluussut qallunaatut allanneqarpat naammagaa, unnerluutigisaq oqaatigineqartunik paasinnissinnaappat ajorinagu.
