Eqqartuussiviit Qullersaat: Kalaallisut oqaasertaqarnissaat piumasaqaataanngilaq
Søren Søndergård Hansen ima oqarpoq:
- Eqqartuussivinni isumaqarpugut, unnerluutigisaq kalaallisut oqaluttuuppat, taava unnerluussut kalaallisut allassimassasoq. Tamanna peqquteqarpoq, kalaallit oqaasii Kalaallit Nunaanni ikinnerussuteqartut oqaasiisut isiginnginnatsigit, taamaammat kalaallit oqaasii nalinginnaasumik atorneqartariaqartut, nunap eqqartuussisuunera Søren Søndergård Hansen oqarpoq.
Højesteretili isumaqataanngilaq. Tassani 2009-mi aalajangiinermi naqissuserneqarpoq, unnerluutigisaq qallunaatut paasisinnaappat, taava unnerluussisussaatitaasut unnerluussummik eqqaartuussumilluunniit nangitseqqinnissamik nalunaarutinik kalaallisuunngortitsisariaqanngitsut.
Unnerluutigisaq kalaallisuinnaq oqaluppat, oqaasiinnakkut nutserussinissaq naammattoq, aalangiinermi aamma naqqissuserneqarpoq. Taamalu aalajangerneq Søren Søndergård Hansenip uggoraa.
- Unnerluutigineqarnermi unnerluussutip oqaatsit ilitsoqqussat atorlugit atuarsinnaanissaa pingaaruteqartuaannarpoq. Suna pillugu unnerluutigineqarnermik pasinnilluinnarnissaq, inatsisitigut isumannaatsumik pineqarnissamut aallaavitsialaassammat. Illersuisumik oqaloqateqarnissamut aammalu eqqartuussivimmi sassarnissamut piareersarnissamut tamanna periarfissiilluassammat, Søren Søndergård Hansen oqarpoq.
Politiilli tamatumunnga isumaqataanngillat, eqqartuussisarnerlu pillugu inatsimmi malittarisassat uani innersuussutigineqarput.
- Unnerluussutip qanoq isikkoqarnissaanut eqqartuussisarneq pillugu inatsimmi malittarisassaqarpoq. Tassanilu allassimavoq, unnerluussut oqaatsit unnerluutigineqartup paasisinnaasai atorlugit allanneqassasoq, taamaanngippallu nutserneqassalluni, politimesterip tullia Morten Nielsen oqarpoq.
Suliassat marluk kalaallisut nutserneqarsimanngitsut Nunatta Eqqartuussiviata 2008-mi suliariumanngilai. Taama aalajangerneq unnerluussisussaatitaasut Højesteretimut ingerlateqqippaat.
- Nunatta Eqqartuussisuuneqarfiata inatsimmik paasinninnera isumaqatiginngilarput. Unnerluussisussaatitaasullu - allatulli eqqqartuussivimmi suliassaateqartutut - eqqartuussiviup paasinninnera qulliunerusunut suliareqqitassanngortissallugu periarfissaqarpugut, taamaaliorpugullu, politimesterip tullia Morten Nielsen oqarpoq.
Taanna nangilluni oqarpoq, Nunatta Eqqartuussisuuneqarfiata aalajangernera ingerlateqqissimagitsik, apeqqut tunngaviliisutut unnerluussisussaatitaasut isigimmassuk:
- Inatsisilerituunut, unnerluussisussaatitaasunut eqqartuussiveqarfimmullumi isumaqartorujussuuvoq, eqqartuussiviit aalajangiineri aamma inatsisinut naapertuuttuussasut, vicepolitimester Morten Nielsen oqarpoq.
Eqqartuussivinni oqaatsinik atuineq Nunatta Eqqartuussivii pillugit siunnersuisoqatigiinni oqaluuserineqarsimavoq. Tassani siulittaasoq Per Walsøe KNR-imut oqarpoq, ajornartorsiut eqqumaffigigitsik, maannali inassutissaqaratik.
