Eqqartuussiveqarfiit sisamaannanngortinneqarnissaat nuannaarutigaat

Eqqartuussisut Peqatigiiffianni siulittaasoq Myrna Lynge ima oqarpoq:

- Eqqartuussiveqarfinni suliassaaterpassuatsinnut piffissaqarnerulissaagut ikilisarsinnaassallugillu. Tassa eqqartuussiveqarnermi sulineq taama isikkoqarallartillugu, eqqartuussisullu arfineq-marluugallartillugit taamatut ataatsimoorluni eqqartuussivinni sisamavinni suleqatiginnikkut suliassanik ikilisaasinnaassagatta, Myrna Lynge oqarpoq.

Nunatsinni eqqartuussiveqarfiit kommunit kattussorneqarnerattut isikkoqalernissaat, tassa sisamaannanngortinneqarnissaat, Eqqartussissut Peqatigiiffiata qangalili neriuutigisimagaluarpaa, Danmarkimili naalakkersuisut siuliinit taama aaqqissuussisoqarnissaanut aningaasaliissutissat akuerineqanngillat, suliarlu piviusunngunngitsoorluni.

Eqqartuussiviit nunap immikkoortuinut katersuunneqarnerisa malitsiganik illunik eqqartuussivinnik sisamanik sanaartortoqassaaq.

Nunatsinni eqqartuussiviit sisamaannanngortinneqarnissaasa piaartumik piviusunngortinneqarnissaa Myrna Lyngep neriuutigaa:

- Folketingimi Nunatsinnit ilaasortaatitatsinnut saaffiginninnitsigut eqqartuussiviit sisamaannanngortinneqarnissaannut siunniussaqarnerup sukkanerusumik piviusunngorsinnaanissaa neriuutigaarput, Nunatsinniimmi massakkut ilaasortanngortut, Doris Jakobsen aamma Sara Olsvig, massakkut naalakkersuisunngortunik tapersersuisuupput, taakkualu aqqutigalugit kaammattueqataasinnaalluta, Myrna Lynge oqarpoq.

Eqqartuussiviit sisamaannanngortinneqarpata innuttaasut sullinneqarnerat eqqorneqarnerlussanngila?

- Naak inuit ingerlaannartumik saaffiginnissinnaannginnerat ajuusaarnaraluartoq iluaqutissartai annertunerujussuusut isumaqarpunga, eqqartuussisummi angalaaginnavittarput, assersuutigalugu uagut qaammatit tamaasa Tasiilamiittarpugut, Myrna Lynge oqarpoq.