Eqqartuussisutut naammassisut qulingiluat ullumi allagartartaarput

Myrna Lynge taakkununnga ilaavoq, eqqartuussisutullu sulinissaminut maanna atortussaqarlualersutut misigisimalluni:

- Ukiut pingasut atuareerluta naammassivugut. Modulikkuutaarlugu aaqqissuussaagami, arfineq-marluullutik. Akornatigullu suliutigaluta ilinniarnerput ingerlallugu. Inatsisinut tunngasortai atuariartuaarsimavavut, assigiinngitsut tulleriiaarlugit, sakkortusarsimaqaaq, Myrna Lynge oqarpoq.

Eqqartuussisutut naammassinermini Myrna Lynge pinerluttulerinermut tunngasuni, inuit saqitsaannerinik suliassani, ilaqutarinnermilu tunngasuni saqitsaannernut eqqartuussisuusinnaanngorpoq.

Eqqartuussisunngorniartut ilinniarnerminni inatsisilerinermik aamma suliassanik isumaginninnermik piginnaaneqalerput, sulinerminni iluaqutigisinnaasaminnik. Aamma eqqartuussisutut sulineq siusinnerusukkut saniatigooralugu suliffiugaluartoq, maannamiit piffissaq tamakkerlugu suliffiulissaaq.

- Ilinniarneq sakkortoqaaq, Myrna Lynge oqarpoq, ilinniaqatigisimasaalu Eleonora Storch Aasianneersoq isumaqataavoq.

Taanna avannaani eqqartuussivinni eqqartuussisutut atorfeqarpoq, Kangaatsiamiit Qaanaaq tikillugu eqqartuussiveqarfinni eqqartuussisuulluni.

Eleonora Storch eqqartuussisutut maanna naammassivoq, tamannalu nuannaarutigeqaa:

- Pilluarnaqaaq. Misigisimavunga angorusutara angullugu. Taamaattumik oqarfigineqarama angusillunga qianngitsuulaanngilanga angajoqqaarigaluakka eqqaallugit. Pilluarnaqaaq, eqqartuussisutut ilinniarnermini naammassisoq Eleonora Storch, Aasianneersoq, oqarpoq.

Eqqartuussisutut taagorneqalernissartik sioqqullugu eqqartuussisut siunnersuisoqatigiiffiannit inassutigineqarlutik eqqartuussivinnut pisortaqarfimmit akuerineqaqqaassapput.