Politikki Inuussutissarsiutit

PITUFFIK Eqqartuussisoq: Exelis Servicesip piumasaqaatit naammassivai

Pituffimmi kiffartuussinissamik isumaqatigiissutip 2014-imi suliariumannittussarsiuunneqarnerani amerikamiut ingerlatseqatigiiffiannut tunniunneqarnera pillugu danskit ingerlatseqatigiiffiisa arlariit naammagittaalliuuteqarnerat eqqartuussivimmit isumaqatigineqassanersoq suli nalunarallarpoq.

Allattoq Helle Nørrelund Sørensen

marsip 21-at 2016 07:39

Nutserisoq Simon Uldum -

Amerikamiut eqqartuussivianni (The General Counsel, aaqq.) qanittukkut tusarniaasoqarmat, USA-p, Danmarkip Nunattalu akornanni Pituffik pillugu politikkikkut isumaqatigiissutaasut aallaaviginagit suliariumannittussarsiuunnermi oqaasertaliussat aallaavigineqassasut eqqartuussisut naqissuserpaat.

Nittartagaq finans.dk taama allaaserisaqarpoq.

- Imaassinnaavoq isumaqatigiissutip nunani allamiut ingerlatseqatigiiffiannut allanit aqunneqartumut tunniunneqannginnissaanik naalagaaffiit marluusut (Danmark aamma USA, aaqq.) siunertaqarsimasut. Tamannali nunat naalakkersuisuisa isumagissavaat. Isumaqatigiissutaasut atorunnaarsissinnaavaat suliariumannittussarsiuuteqqillugillu. Suliariumannittussarsiuussisoqarnerali matumani pineqarpoq.

Ingerlatseqatigiiffiit amerikamiut sakkutuuinik timmisartortartunik eqqartuussivimmut suliassanngortitsisut tassaapput Greenland Contractors, Per Aarsleff aamma Copenhagen Arctic. Taakku isumaqarput Pituffimmi kiffartuussinissamik isumaqatigiissutip ingerlatseqatigiiffimmut amerikamiunit pigineqartumut Exelis Services A/S-imut tunniunneqarnera Danmarkip, Nunatta USA-llu akornanni illersornissamik isumaqatigiissutaasumut unioqqutitsisoq.

Aamma atuaruk Suliariumannittussarsiuussinermut malittarisassat nutaat Namminersorlutik Oqartussat akuerisimavaat

Illersornissaq pillugu isumaqatigiissut naapertorlugu kiffartuussinissamik isumaqatigiissut danskit kalaallillu ingerlatseqatigiiffiinut taamaallaat tunniunneqarsinnaavoq.

Exelis Servicesilli malittarisassat danskit nunanut allanut ministereqarfianit akuerineqartut malillugit Danmarkimi aktiaateqarluni ingerlatseqatigiiffittut eqqortumik nalunaarsorneqarsimanera amerikamiut eqqartuussivianni tusarniaasoqarmat eqqartuussisut ilaannit erseqqissaatigineqarpoq.

- USAF-ip (amerikamiut sakkutuui timmisartortartut, aaqq.) suliariumannittussarsiuussinermi piumasaqaatit oqaasertaat malittussaavaat. Taamaaliortoqarpoq, piumasaqaatillu Exelisimit naammassineqarput. Ingerlatseqatigiiffittut nunami allami ingerlatseqatigiiffimmit aqunneqartutut nalunaarsorneqarsimanngilaq.

Eqqartuussiviup upernaaq manna kingusinnerusukkut aalajangernissaa naatsorsuutigineqarpoq.

Suliariumannittussarsiuussinermi oqaasertaliussat eqqartuussivimmit malinneqassappata, isumaqatigiissut Exelis Servicesimut, suliariumannittussarsiuussinermi ajugaasumut, utertinneqarsinnaavoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.