Eqqartuussinissaq aqagumut kinguartippaat

Ilisimannittoq najuussiinnaanngimmat, eqqartuussinermut aalajangiisuusussanik paasissutissanik ilisimannittutut isigalugu, eqqartuussisut eqqartuussineq kinguartippaat. Ilisimannittoq ataaseq Danmarkimiimmat ujarneqassaaq, eqqartuussinerullu nanginnera aqagu ullaap-tungaa qulingiluap- qeqqa nanginneqassasoq aalajangiuppaat.

Eqqartuussineq, ullaaq qulingiluanut aallartittoq, ulloq naallugu ingerlanneqarpoq, unnerluussisut misissuinerit inernerannik saqqummiipput, unnerluussat ilisimannittullu tallimat apersorneqarlutik. Saqqummiinerit apersuinerillu naammassereersut paasinarsivoq, David Fiskerip juulliaraq aqaguttoq aalakoorluni aallaamaqalunilu 37-nik ukiullip inaanut unnerluussat isersimasut ornissimagai.

Unnuaani perulluliorluni unnerluussap aappaa 37-nik ukiulik saassuttaqattaarsimavaa toqqusassimallugulu. Ingerlasarsimavoq, marloriarlunilu 37-nik ukiullip inigisaanut utertarsimalluni, iseraangami saassuteqqittarsimallugu. Kingullermik aggermat matu parnaaqqavoq, David Fiskerillu matu tukerlugu ammarpaa. unnerluussap aappaa 42-nik ukiulik toqqusassissimallugu. Unnerluussat imminnut ikiortarlutik David Fisker peersittarsimavaat eqqissisartarlugulu. David Fisker ingerlaqqissimavoq, tamatuma kingorna unnerluussaasut 42-nik ukiullip inaanukarsimapput.

Iseramik eqqissisarsimapput, 42-nillu ukiullip David Fisker uteqqissagaluarpat susinnaajunnaarsinnissaanut atugassatut timmiarsiutit arlallit piareersarsimavai, sulilu eqqissivinngitsut arferngup missaani David Fisker isernialersimavoq matuersaatini aanerarlugit. Ingerlaqquneqaraluaramilu ingerlasimanngilaq, matulu tukerlugu isermat 42-nik ukiullip niuatigut aallaasimavaa, David Fiskerillu aavernini pissutigalugu ullaakkut kingusinnerusukkut toquvoq.

Unnerluussat imigassartorsimanngillat.

Nuummi eqqartuussivimmi unnerluussanik eqqaartuussineq aqagu aalajangerneqassasorineqarpoq.