Eqqartuunneqarsimasumut tunngatillugu iliuuserisimasani Kommune Kujalliup ajuusaarutigaa
Kasper Brandt meeqqanik atornerluisimasutut sisamariarluni eqqartuussaanikuugaluarluni meeqqanik suliaqartinneqartarsimavoq, kommunillu matumani sumiginnaanera KNR-imi arlaleriarluta oqaluttuaraarput, soorlu aamma pinerliisimannginnermut uppernarsaammik kommuni noqqaasimagaluarpat tamanna pinngitsoortinneqarsimasinnaagaluartoq oqaluttuarinikuugipput.
Eqqartuunnqarsorli atorfinitsinneqarani ataasiaannarlugu atorneqarsimanera, Kommune Kujalliup taassuma saniatigut aamma erseqqissaatigaa.
- Taamaalilluni kommuni pisumi tassani meeqqanik pinerliisimannginnermik uppernarsaammik noqqaanissaminut pisussaaffeqarsimanngilaq, Kommune Kujalleq tusagassiuutinut nalunaarummi ilaatigut allaatigisaqarpoq.
Meeqqanilli sullissisinnaanissamut neqerooruteqartuusaarsimasumit pineqarsimini, Kommune Kujalliup ajuusaarutigaa:
- Suliami erloqinaqisumi, ulluni makkunani tusagassiuutitigut eqqaaneqartarsimasumi, inuk meqqaanik inuusuttunillu kinguaassiuutitigut kanngutsaattuliortarsimasutut eqqartuunneqarsimavoq, meeqqanut inuusuttunullu sunngiffimmi neqerooruteqartuusaarluni meeqqat inuusuttullu attavigisarsimavai, tamatumani Kommune Kujallermiit assorsuaq ajuusaarutigineqarpoq niviarsiaraq ukiukitsoq eqqartuunneqarsimasup suliniutaanut peqataasussatut kommunimiit ilanngutsinneqarsimammat, Kommune Kujalleq tusagassiuutinut ilaatigut allappoq.
Meeqqalli eqqartuunneqarsimasumut "tunniunneqarsimanngitsut", kommunip aamma erseqqissaatigaa, eqqartuunneqarsimasulli neqeroorutaanik ingerlatitseqqiinnarsimanini oqaatigalugu, billetsissaanillu akiliisimaneraannarluni:
- Kommunip nassuerutigaa kommunip billetsimik akiliinera aamma kukkunerusoq, tassa aaqqissuussineq piviusuunngimmat, Kommune Kujalleq tusagassiuutinut nalunaarummi ilaatigut allaaserisaqarpoq.
