Eqqarsartaatsikkut peqqinneq imminullu toqunissamik pinaveersaartitsineq pillugu ataatsimeersuaartut
Ippassaq septembarip ulluisa qulingat tassaavoq nunat tamalaat peqqinnissakkut suliniaqatigiiffiata WHO-p, nunarsuaq tamakkerlugu imminut toqunnissamik pinaveersaartitsiniarnermik ullorititaa.
Ukioq manna nunarsuaq tamakkerlugu imminut toqunnissamik pinaveersaartinnissaanut ulloritami imminut toquttoqartarneranik oqaluttuarineqartarneranik nutarterineq qulequtarineqarpoq.
Tamannalu malunnartinniarlugu suliniut Suleqat Pisinnaasoq eqqarsartaatsikkut peqqinneq imminullu toqunnissamik pinaveersaartitsineq pillugu suliffeqarfinnut Katuami ippassaq ataatsimeersuartitsivoq.
Suleqat Pisinnasoq, SUPI, suliffeqarfinni sulinermi avatangiiserissaarnissaq, atugarissaarnissaq isumannaatsuunissarlu pingaartillugu suliniutaavoq.
Pissarsiaqarluartoq
Ataatsimeersuarnermi suliffeqarfiit Ilulissaneersut Sisimiuneersullu aamma peqataapput.
Suliffeqarfinni suleqatigiit nersualaartarnissaat pingaartuusoq oqaatigineqarpoq, suliffeqarfinnimi ilaaneeriarlutik suliap kusanartumik inerneqarnera pinnagu kukkunerit isiginiarneqarnerusartut ataatsimiinnermi assersuutigineqarpoq.
EMJ-Atcon Greenland A/S-ip ataaani Sulisa-mi sanasoq Titsi Kleist ataatsimeersuarnermi pissarsiaqarluarpoq.
-Apersueriaasermut taavalu qanoruna ikiuisinnaanersugut, oqaatsit atorneqartut tamakkua assigiinngitsut suliffiup peqqinnartuuneranut taakkununnga tunngasukujuit, Titsi Kleist oqarpoq.
EMJ-Atcon Greenland A/S ataatsimeersuannginnermi suliffimmi peqqinneq anguniarlugu pikkorissartarsimapput, tamannalu iluaqutaasivoq.
-Pikkorissarnermi atugarissaarneq anguniarsarinikuugatsigu. Uku pikkorissarnikujuit ingerlasut taakkua peqatigiiffigivagut pissarsiaqarnartorujussuuvoq iluarlunilu suliffiup peqqinnerunissaanut, Titsi Kleist oqarpoq.
Suliffeqarfinni eqqarsartaatsikkut peqqinneq imminnullu toqunnissamik pinaveersaartitsineq pisariaqartoq
SUPI Sulisitsisut siorna pilersippat, suliniummilu suliffeqarfiit Ilulissaneersut, Sisimiuneersut, Ittoqqortoormiuneersut Nuummeersullu peqataapput.
Ataatsimeersuannginnermi SUPI suliffeqarfinnut eqqarsartaatsikkut peqqinneq imminnullu toqunnissamik pinaveersaartitsineq pillugu pikkortissartitsisaqattaartitsisimasoq SUPI-mi siunnersorti Erik Vestergård oqarpoq.
- Workshopinik ilinniartitsilluta suliffeqarfinnut aamma teknikkimik ilinniarfinnut sapaatip akunnerini marlunni kingullerni pulaaqattaarpugut, maannalu inuppassuit ilinniartereerpagut.
Suliffeqarfinni eqqarsartaatsikkut timikkullu peqqissuseq pingaartinneruneqartariaqartoq siunnersortip Erik Vestergårdip oqaatigaa.
-Isumaqarpunga Kalaallit Nunaanni kulturiannut attuumassuteqartoq, immitsinnut qanoq innerluta aperisarnissarput ajornakusoorsinnaasarpoq. Taamaattumik uagut suliatsinni pingaarnerit ilagaat suleqatip aperinissaa: Qanoq ippit? Tamannalu suliariniavissorparput.
Sulisitsisunilu pisortap Christian Keldsenip ataatsimeersuarnerup soqutigineqarluarnera nuannaarutigaa.
-Peqataarusunnersuaq nuannaarutigalugulu tupaallaatigivara, aamma inuit peqataarusullutik qanoq pimoorussitiginerat nuannaarutigalugit, Christian Keldsen oqarpoq.
Suliniullu allanik aamma pilersaaruteqartoq Erik Vestergårdip oqaatigaa.
-Suliffeqarfinnit inuiaqatigiinnut attaveqaataasussanik ilinniartitsinissaq alloriarneq tulliussaaq. Tamanna attaveqqartutut ilinniartitaanermik imaluunniit attaveqarnrmut pikkorissarnermik taaguuserparput, Erik Vestergård oqarpoq.
Australiami suliffeqarfimmit isumassarsiaq
Suniliut SUPI Australiamiut suliniutaannit MATES in constructionimit isumassarsiaavoq.
MATES in Construction Australiami sanaartornermi inuussutissarsiuteqarfimmi imminut toqunnissamut pinaveersaartitsinermut tarnikkullu peqqissutsimik suliniuteqartuuvoq.
Suliffeqarfimmi MATES in Constructionimi pilersitsisoq Jørgen Gullestrup ataatsimiinnermi immikkut qaaqqusaalluni oqalugiartuuvoq, taassumalu nunatsinni suliniuteqartut suleqatigisimavai.
-SUPI suleqatigisimavarput, taavalu ilisimasat isumassarsiallu ilaat tapersersorniarlugit suliniutigisimavagut. Isumassarsiagut atorpaat pingaaruteqarporli isumassarsiat tamakkua Kalaallit Nunaanni pissutsinut naleqqussarluinnarnissaat kalaallisullu atornissaat.
Suliffeqarfiup MATES in constructionip Australiami suliffeqarfinni assigiinngitsuni sulisut MATES in Construtionimut kajumissutsimik ikiuuttunngortarput, massakkumullu inuit 35.000 missaaniittunik kajumissutsimik sulisoqarpoq.
-Australiami suliffeqarfiit ikiorniarlugit suliniummik sanaartorfimmit sanaartorfimmut neqeroortarpugut. Suliniut pingasunik immikkoortortaqarpoq, tassani sulisut tamarmik tarnikkut peqqissuseq aamma imminut toqunnissaq oqaloqatigiissutigisarparput. Tamanna inuussutissarsiortutut ataatsimoorluta aaqqiissuteqarfigisariaqaratsigu.
