Eqqaamalaariaruk qimmit aasami aamma qilalertaqimmata
Imaanngilarli qimmiutillit qimmitik puiguinnarsinnaagaat. Tassami imertinneqarlutillu nerisinneqartussaasut, peqqinnissamik nakkutilliisoq tusagassiuutinut allakkamini nalunaarpoq.
Aasat tamaasa naammattoortarpavut qimmit qilallutik perlerlutilluunniit toqusut. Taamaattumik pingaartorujussuuvoq ullut tamaasa imigassaqartinnissaat, uumasut nakorsaat Ilulissani najugalik Sanne Eline Wennerberg oqarpoq.
Taanna ilanngullugu oqarpoq, aasat tamaasa Nunatta avannaani uumasunik paarsinissamik inatsimmik qimmiutillit unioqqutitsisartut, qimmitik paarisannginnamikkit.
Qimmit toquinnarsimanngikkunik ima sanigorsimatigisarput, allaat aallaallugit toquinnartariaqarlutik.
- Qimmiuteqarneq piffissarujussuarmik tigusisarpoq. Paasineqarluarsinnaavoq aasaanerani inuit sulinngiffeqarusuttarmata, angalaarlutilluunniit. Qimmeqaraannili taamaaliortoqaannarsinnaanngitsoq uumasut nakorsaanerat Sanne Eline Wennerberg oqarpoq.
Kommuni imermik pilersuissaaq
Ilulissani Nukissiorfiit ukiorpassuanngortuni qimmiliviit eqqaanni tankeeqqanik immiisarput.
Ukioq manna kommunip ingerlatsinermut immikkoortortaa tankinik immiisartuussaaq.
- Pitsaalluinnarpoq kommune qimmit pitsaasunik atugassaqartikkusullugit iliuuseqarmat. Taamaakkaluartoq qimmiutillip qimmiminut ullut tamaasa nerisitsinissani imertitsinissanilu akisussaaffigigai, uumasut nakorsaat erseqqissaavoq.
Qimmip 30 kiilunik oqimaassusillip imeq ullormut pisariaqartitaa 2-3 literiusarpoq. Qimmit imertinneqarneq ajortut ullut arlaqanngitsut qaangiukkaangasa toqusarput.
