Eqalunni eqqaavissup silaannaq tippatsippaa
Qatserisartut inuttassaaleqinertik atortussaminnilu amigaateqarnertik pissutigalugu innerup nammineerluni qaminnissaa aalajangiuppaat. Ikuallanneratami sivisunnginnissiaa naatsorsuutigineqaraluarmat.
Iqalunnili eqqaavissuaq sapaatit akunnerisa pingajussaanni suli ikuallappoq, pujuatalu ussitsup illoqarfiup annersaa pujorfigisarpaa. Ikuallannerup pujua maanna ima ussitsigaaq Iqalunni atuarfiit ilaat sapaatip akunnerani matumani matuneqartariaqarsimallutik.
Eqqaavissuaq siullermiilinngitsumik ikuallappoq, pujuali siornatigut taama ussitsigineq ajoraluarpoq. Ikuallanneqartartummi tassaanerusarmata pappiaqqaneersut eqqakkat nalinginnaasut. Maannali eqqaavissuarmiittut plastikkit patsisigalugit pujua naatsorsuutigineqanngikkaluartumik ussinnerujussuuvoq. Plastikkit ikuallanneqartut tassaallutik puussiat annerusumillu puiaasaaqqat plastikiusut imermik sodavandinillu imaqartartut.
Illoqarfimmi qatserisartut ittuat Luc Grandmaison nutaarsiassaqartitsivimmut CBC News-imut oqarpoq, eqqortumik sammiveqartumik anorlilernissaa utaqqineqartoq, pujormi illoqarfimmiittoq taamaalilluni tinginneqarniassammat.
Silap allanngornissaa utaqqineqaraluartillugu, Iqalunni peqqissutsimut qullersat mianersoqqussuteqarlutik oqaatigaat, utoqqaat, inuit uummatimikkut puammikkulluunniit ajoquteqartut aamma meeqqat minnerit silami aneernaveersaartariaqartut.