Ataatsimiititaliarsuaq: Nunami aarlerinaatilimmiissimaguit ulluni 14-ini angerlarsimaannarit

Italiameereerlutit nunatsinnut tikikkuit napparsimmavinnut, utoqqaat illuinulluunniit allanut aarlerinaateqarfiulersinnaasunut ornigutissanngilatit. Tunillaassortunik nappaalasoqarneranut ataatsimiititaliarsuaq nutaanik taama innersuussuteqarpoq.
Italiap avannaani tuniluutilertortoqarnera pissutaalluni Italiap avannaanut angalasoqannginnissaa, nunanut allanut tunngasunut ministereqarfiup ataasinngornermi kaammattuutigaa. Italiap avannaani immikkoortortanut sisamanut pisariaqavitsinnagu angalasoqannginnissaa, ministereqarfiup kaammattuutigaa. Assi © : Scanpix
Allattoq Anne Meisner Synnestvedt
marsip 04-at 2020 09:27
Nutserisoq Mads Lynge

Kinamiissimaguit, Singaporemiissimaguit, Hong Kongimiissimaguit, Japanimiissimaguit, Korea Kujallermiissimaguit, Iranimiissimaguit Italiamiissimaguilluunniit, taava ulluni 14-ini angerlarsimaannarit.

Tunillaassortunik nappaalasoqarneranut ataatsimiititaliarsuaq nutaanik taama innersuussuteqarpoq. 

COVID-19-imik, coronavirusimit pisumik, nunani tamalaani nappaalasoqarnera tusareerparput, nualluut tuniluutilertupallalluni. Italia taakkununnga ilaavoq. Italia Kalaallit Nunaannit takornariarfissatut nuannarineqarluartoq, tunillaassortunik nappaalasoqarneranut ataatsimiititaliarsuup tikkuartorpaa.

- COVID-19-ip Kalaallit Nunaanni tuniluutilersinnaanissaanik kinguneqarsinnaavoq, soorlu Islandimi Danmarkimilu tamanna takoreeripput, tusagassiutinut nalunaarummi taama ilaatigut allaasimavoq.

Italiap avannaani tuniluutilertortoqarnera pissutaalluni Italiap avannaanut angalasoqannginnissaa, nunanut allanut tunngasunut ministereqarfiup ataasinngornermi kaammattuutigaa. Italiap avannaani immikkoortortanut sisamanut pisariaqavitsinnagu angalasoqannginnissaa, ministereqarfiup kaammattuutigaa.

AAMMA ATUARUK Innuttaasut coronavirus ernummatigaat: Amiilaarnaqaaq

Innuttaasullu sumiiffinni ukioq manna marsip ulluisa aappaannit aarlerinaatilinniissimasunut atatillugu tunillaassortunik nappaalasoqarneranut ataatsimiititaliarsuaq tamanna pillugu innersuussuteqarpoq - nunat pineqartut tassaapput Kina, Singapore, Hong Kong, Japan, Korea Kujalleq, Iran Italialu.

- Suliffeqarfiit ilinniartoqarfiillu innersuussutitsinnik tapersersuinissaat kaammattuutigaarput, nappaatip inuiaqatigiinni tuniluutilernissaa taamaalilluta pinngitsoortinniassagatsigu, nunatta nakorsaanera, Henrik L. Hansen, tusagassiutinut nalunaarummi oqarpoq.

Innuttaasut nunani qulaani taaneqartuniissimallutik angerlamut utertut napparsimmavinnut, utoqqaat illuinut illuutinullu aarlerinaateqarfiulersinnaasunut allanut ornigutinnginnissaat innersuussutigineqarpoq.

Aamma atuaruk