Coronavirusip nunatsinnut anngutinnginnissaat Helga Mortensen Nuumminngaaneersup kissaatiginagu oqarpoq.Assi: KNR

Innuttaasut coronavirus ernummatigaat: Amiilaarnaqaaq

Naak Coronavirus nunatsinni suli tuniluutinngikkaluartoq, innutaasut ernumapput. Nappaatilli tuniluuttartut pillugit ataatsimiitsitaliarsuarmi ilaasortaq ernumassuteqanngilaq.

- Amiilaarnaqaaq. Nunatsinnut anngunnissaa neriuutiginngilara.

KNR-ip Nuummi aqqusinermi naapitaa, Helga Mortensen taama oqarpoq.

Coronavirusi qaammatini kingullerni tusagassiuutitigut nittartakkakkullu attaveqaqatigiittarfitsigut oqallisigineqangaatsiarpoq, aamma nunatsinni.

Naak nualluut nunatsinni siaruaatinngikkaluartoq, innuttaasunut sunniuteqanngitsuunngilaq.

- Siullermik imatut eqqarsaatiginngikkaluarpara, kisianni eqqartorneqaleraluttuinnartillugu misissuataalaarpara sunaanersoq aamma qanoq sunniuteqarsinnaanersoq, Laila K. Thomassen Brugsenimi sulisuusoq taama oqarpoq.

Nualluut coronavirus Danmarkimut sapaatip akunnerata siuliani anngukkami nunatsinnut qanilliallattuusivoq.

Ilaasortaq ernumanngilaq

Kalaallit Nunaannili nappaatit tuniluuttartut pillugit ataatsimiititaliaq periusissanik piareersimavoq.

Ataatsimiititaliamilu ilaasortaq, Svend Foldager ernumassutissaqanngilaq.

- Ataatsimut isigissagaanni, nappaatip tuniluunnera nunatsinnut ernumanartussaqartinngilara. Nualluutimmi allat assigivai.

Taanna oqarpoq nangillunilu :

- Immikkut ulorianassuseqarnerunngilaq. Nunarsuarmili oqallisigineqangaatsiarpoq, nualluutini nutaajummat, tuniluullunilu. Kisianni nualluutinit allanit toqunarnerunngilaq.

Nualluut nunatsinnut anngutissagaluarpat oqartussat piareersimasut Svend Foldager oqarpoq:

- Piareersarluaqqaqaagut.

Annikitsumik iliuuseqarnikkut tunillatsinneq pinngitsoorsinnaavat

Innuttaasulli namminneerlutik aamma nappatsaaliorsinnaapput.

- Ajornanngitsuaqqamik iliuuseqarsinnaavugut, tassalu assaat eqqiluisaartinnissaat.

- Assaat akulikitsumik asallugit, tunillannartuiaammik tanittarnissaat, quersuleruit qarngit talernik asseruk, taavalu inunnut qanillattornaveersaarnissaq, qanillattornermi tunillatsinnartuuvoq.

Nunatsinni nualluummik tunillatsittoqarsimanissaa pasitsaanneqarpat, tunillatsisimasorisaq misissugassamik tigusiffigalugu misissorneqassaaq, tiguneqartorlu Danmarkimut misissugassanngorlugu nassiunneqassaaq.

Tunillatsissimaneranillu ersiuteqarpat pineqartut angerlarsimaqqusaassasut, Svend Foldager KNR-imut ilisimatitsivoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl