Enoksen: Siumumiikkunnaarama ajortitsiniutit imaaginnalerput

Taama Jakob Ludvigsenip isornartorsiuinera, Hans Enoksenip akillugu ima qisuariarfigaa.

- Qularutigineqassanngilaq aalisarnermut tunngasunik annertoorujussuarnillu aaqqissuusseqqittarnernut sunniuteqartarama. Taamaaliortarpunga aalisartut, piniartut sulisartullu pitsaanerusumik atugaqalernissaat qulakkeerniarlugu. Taamaammat paasisinnaanngilara, pisuutitsiniartumik nipeqarluni, Jakob Ludvigsenip apuussaqarnera. Soormita siusinnerusukkut Siumumiikkallarama tamakku isornartorsiutit uannut tutsinneqarsimanngillat?

Hans Enoksenip partiiliaanut Naleqqamut, Siumup qinersisartuisa nussornissaat annilaanngatigineqartariaqanngitsoq, Avannaani Siumup immikkoortortaqarfiisa ataqatigiissaarisuata, Jakob Ludvigsenip oqaatigereerlugu isornartorsiornini ima nangippaa.

- Imminermini sunniuteqaqataasinnaanini Hans Enoksenip Siumumit aninermini qimarratigereerpaa. Taamaattumik allatut sunniuteqarsinnaanera killilerujussuartussaavoq nutaamilluunniit partiilioraluaruni, Jakob Ludvigsen oqarpoq.

Taassuma isornartorsiutaanut, Hans Enoksen ilaatigut akissuteqarpoq.

- Siumumiikkunnaara ajortitsiniutit imaaginnalerput. Ajunngilaq isornartorsiutitik namminneq akisussaaffigissavaat. Uangulli siumut isigaluta aalisartut ajornartorsiutaat, piniartut ajornartorsiutaat sulisartullu ajornartorsiutaat aaqqinniarlugit sulissaagut. Neriuppungalu Siumukkormiut annertuumik tamassumunnga suleqatigumaaraatigut.

Hans Enoksen taama akissuteqartoq, Jakob Ludvigsenip ima isornartorsiuinini nangippai.

- Piviusoq ilisimareerparput, tassa Hans Enoksen pipallatanik iliuuseqartarpoq. Taamalu iliuuseqarnerit kinguneri inernerilu pitsaasanngitsut ilisimavagut. Soorlu aalisarnermut naalakkersuisuunerata nalaani tamanna takusareeripput. Tassa tamakku Hans Enoksen qimarratigisai, Siumumi ilaasortaanermi nalaani aaqqiiniarnernut  peqataaneq ajornermi kingorna.

Jakob Ludvigsen akillugu Hans Enoksen ima oqarpoq.

- Aalisarnemut Naalakkersuisunngorpunga aalisartut umiarsualivinnik matooraasut, aalisakkat akii appasippallaarneri pissutigalugit taamaaliorlutik. Naalakkersuisuunerma nalaani aalisakkanut tapit allallu aaqqissuuppagut pisassallu qularnaarneqarlutik. Taamaaliornermi aalisartut kattuffiat, KNAPK qanimut suleqatigaara.

Partii Naleqqamik pilersitsilersaartoq, Hans Enoksen taama isornartorsiutinut akissuteqarluni naggataatigut oqarpoq.