Enoksen: INI-p akit appartariaqarpai

Taassuma maanna piumasaraa, A/S INI-p ineqarnermut akigititaasa appartinneqarnissaat pillugit politikerit kommunillu qanoq iliuuseqartariaqalersut.
 
- Inuppassuit akilersinnaanngisaminnik maanna ineqartinneqarput. Akit ima qaffasitsigaat allaat sulisartukkormiut akissarsiannguatik taama appasereertigisut tamarluinnaqqinnaasa ineqarnerminnut akiliutigisarlugit.

AAMMA ATUARUK VIDEO Ineqarnermut akiliutinik kinguaattooruteqartut kingunerlutsitserujussuartut

Hans Enoksenip taama qisuariaateqarnerminut tunngavilersuutigaa, A/S INI-p inissiaataanni najugaqartut akiliinerlu ajortut inigisaminnik anisitaareernermi kingorna inissinneqarallartarfinniisinneqartut, inuit 90-it tungaannut amerlassusillit, septembarip aallaqqaataanniit anisitaaqqinnerisa kinguneranik.

Akiliineq ajortunik illersuinianngilaq
Akiliinerli ajortut taama eqqornerlunneqarneri anniaatiginagu, Hans Enoksen erseqqissaavoq.

- Anniaatiga tassaavoq, A/S INI aqqutigalugu sippulimmik akilersuititaanerput, tamannalu inuiaqatigiit akilersuinnarsinnaajunnaaraat isumaqarpunga, Hans Enoksen oqarpoq imalu assersuuteqarluni:

- A/S INI aningaasarsiornissaminik siunertaqarluni ingerlatsivoq, tamassumalu kingunerisaanik ineqarnermut akit maanna ima qaffasitsigaat, allaat inuit katagarpagut tummaallugillu. Taamaattumik sippulimmik akilersuisitaanerput sippilimmilli ingerlatsisoqarnera inuiaqatigiit akilersuinnarsinnaajunnaarpaat, Partii Naleqqap siulittaasua, Hans Enoksen taama naggasiivoq.

AAMMA ATUARUK   Ineqarnermut akiliutinik akiliinngitsoorsimasut 90-it anisitaasut