Ineqarnermut akiliutinik akiliinngitsoorsimasut 90-it anisitaasut

Inigisaminnit anisitaasut inissinneqarallartarfianiittut 90-it illoqarfinni assigiinngitsuni sisamani septembarip aallaqqaatanit anisitaapput.

Tamanna pivoq inissiaatileqatigiiffik A/S INI inissiaatileqatigiiffik alla Iserit A/S assigalugu Namminersorlutik Oqartussanit pisinnaatinneqarmat inissinneqarallartarfinni najugaqarneq qaammatinik pingasunik sivisussuseqassasoq tassaniinnerminnilu inissarsiornissaannik eqqaasinneqartassasut.

- Inissinneqarallartarfinni najugaqartut qaammatit pingasut ingerlaneranni qaammatit tamaasa ilisimatinneqarput allamik initaarnissartik isumagisariaqaraat, inissinneqarallartarfinni matuersaat septembarip aallaqqaataani taarserneqartussaammat,  inissiaatileqatigiiffimmi A/S INI-mi paasissutissinermik pisortaq Else Løvstrøm oqarpoq.

Inissinneqarallartarfinni najugaqartitsineq inissianit attartortartunit akilerneqartarput, tamannalu ukiumut 6 millionit koruuninik aningaasartuutigineqartarluni.

- Immikkoortortaqarfinni najugaqartut akiliisartut akiligaannik, anisitat inissinneqarallarfimmiittarnerat akilersorneqarput, tamannalu ukiumut 6 millionit koruuninik akeqartarsimavoq, Else Løvstrøm oqarpoq, tassalu taanna septembarip aallaqqaataani unitsinneqarpoq.  

Pisinnaatitsissut atuutilersoq nutaaq malillugu, inissinneqarallartarfinni najugaqarneq qaammatinik pingasunik sivisussuseqassaaq. Manna tikillugu anisitaasimasut inissineqarallatarfinniittut ilaat ukiut qulit tikillugit inissinneqarallartarfinni najugaqartarsimapput.

Inissiaatileqatigiiffiup A/S INI-ip inissinneqarallartarfianiittut Maniitsumi, Qaqortumi, Paamiuni Sisimiunilu septembarip aallaqqaataani anisinneqarput, pilersaarutaavorlu A/S INI-p inissinneqarallartarfiini illoqarfinni allani piffissami qaninnermi anisitsisoqarumaartoq.

Soorlu Nuummi inigisaminnit anisitaasimasut inissinneqarallartarfinniittut oktobarip qaammataani anisinneqassapput.