Amerikami uumasuusivissuarmi tigeri coronavirusimik tunillanneqarsimasoq
Illoqarfissuup New Yorkip ilaani Bronximi tigeri uumasuusivissuarmiittoq coronavirusimik tunillanneqarsimasoq paasineqarpoq.
Uumasumik coronavirusimik tunillanneqarsimasumik USA-mi siullermeerluni naammattoorsisoqarpoq. Nutaarsiassaqartitsivik Reuters naapertorlugu Bronximi uumasuusivissuaq sinnerlugu oqaaseqartartoq taama oqarpoq.
Taamalillumi nunarsuarmi tigerimik coronavirusimik tunillatsittoqarsimanera siullerpaamik uppernarsarneqartoq, taassuma oqaatigaa.
Tigerip sisamanik ukiullip Nadiap panertumik quersortarnerata kingunerisaanik uumasuusivissuarmi paasineqarpoq coronavirusimik tunillanneqarsimasoq.
- Tigeri tunillanneqarsimanersoq qulakkeerniarlugu misissorparput. Nerrerlukkaluarlunilu ajunngilaq uumasullu nakorsaanit nakkutigineqarluarluni, Bronx Xoo taama nalunaarpoq.
Uumasuutit qanillattorneqassanngitsut
New York Citymi uumasuusivissuit sisamat aamma aalisakkanik naasunillu uumatitsivissuaq ataaseq marsip ulluisa 16-annili matoqqapput.
Inuit coronavirusimik tunillanneqarsimasut uumasutiminnut coronavirusip ilisimasarfigineqarnerulernissaata tungaanut qanillattussanngitsut, Amerikami oqartussat innersuussutigiuarsinnarpaat. Nutaarsiassaqartitsivik AFP taama allappoq.
Belgiami qitsuk marsimi misissorneqarmat coronavirusimik tunillanneqarsimasoq paasineqarpoq. Hongkongimilu qimmit marluk coronavirusumik tunillanneqarsimasut aamma paasineqarput.