Ejnar Mikkelsenimut qimagutitinneqartut tamarmik attortisimaqaat
Umiarsuup alapernaarsuutip Ejnar Mikkelsenip innuttaasut Uummannap sulluaniit ataasinngornermi Aasiannukaassorpai. Akunnerit aqqanillit angalanermi misigissutsit assigiinngissimaqisut Ejnar Mikkelsenimi pisortaq, Jørgen Bruun KNR-imut oqarpoq.
- Ilaasut pisumik sunnertisimaqalutillu qasoqisut takuneqarsinnaavoq. Qasuersaarlutik nalaasaarsinnaanissaat, nerisaqarsinnaanissaallu isumagaarput. Issimanerminni amigaateqannginnissaat isumagaarput, Jørgen Bruun oqarpoq, nangillunilu:
- Uummannap sulluaniit allaratta ilaat iluani issippat, ilaat tussunngullutik isiginnaarlutik qaavaniipput. Inuit pakkutaarlutik qullilipput.
AAMMA ATUARUK Ataqqinartorsuup dronningip eqqugaasut misiginneqatigai
Innuttaasut qimarngutitinneqartut 49-t Aasiannukariartorlutik umiarsuarmiittut takullugit tamanik attuinngitsoorsinnaanngitsoq, Jørgen Bruunip oqaatigaa.
- Inuit inuunerminni tunngavitik tamarmik annaagaat takullugu assut ajukkunnaqaaq. Pigisatik, illortik annaavaat. Umiarsuarmut pigisami sinnerinik nammattagannguamik puussiannguamilluunniit taamaallaat nassataqarput. Siunissap qanoq ikkumaarnera ilisimanagu nunamut pisinneqarput.
Siunissarli isumalluarnarnerarpaa.
- Misigisimavungali eqqugaasut isumagineqarnissaannut ajunngilluinnartumik sulissuteqarniartoqartoq, Jørgen Bruun oqarpoq.
Umiarsuaq alapernaarsuut Ejnar Mikkelsen maanna piffimmut pisoqarfiusumut Uummannap sulluanut uteriartorpoq. Umiarsuup suliassaata tullia suli aalajangivinneqanngitsoq, Jørgen Bruunip oqaatigaa.
AAMMA ATUARUK Nukannguup Nuugaatsiami tassaarsuaq imaaniit isiginnaarpaa
AAMMA ATUARUK Aqqartartut innap sisooqqissinnaanera pissutigalugu ujaasinaveertut