Ilinniartitsisut imminnut illersornissaminnik ilinniartinneqarusuttut
Meeqqat atuarfiini atuartut ullutsinni sakkortusiartuinnavittut, aviisip AG-p IMAK-ip siulittaasortaavata ilinniartitsisut atuagassiaani suliaq pillugu allaatigisaqareersoq allappoq. Ilinniartitsisut imminnut illersornissaminnut pikkorissartinneqarusulerput.
AAMMA ATUARUK Ilinniartitsisut siulittaasortaaqqittut
Ilinniartitsisoq ukiuni aqqaneq-marlunni misilittagaqartoq naapertorlugu atuartut persuttaasarnerat qaqutigoortuunngilaq.
- Uanga nammineerlunga naammattoorsisarnikuuvunga tassanngaannaq kamaleriataartumik, taavalu aamma aqussinnaajunnaarlutik, atuartut iluminni imminnut tiggullutik kamaattut imaluunniit isumaqatigiinnginneq aallaavigalugu tassanngaannaq kamattoqariataarsinnaasarpoq, Tula Thorsen Møller, Qaqortumi ilinniartitsisoq oqarpoq.
Nukissortoqaraangat ilinniartitsisumut sakkortusinnaasarpoq.
- Ilunngersunarsinnaavoq assoruunnarsinnaavoq timikkut tarnikkullu oqimaassinnaasarpoq, ilinniartitsisoq oqarpoq.
Ilinniartitsisut kamattoqarnerani iliuusissaarullutik akersuunnermut aaqqiinissaminut sakkussaaleqisinnaasarput.
- Nalungaangatsigu qanoq ilioriassalluta taava pisoqapallassinnaasarpoq sukkasoorujussuarmik taava ilisimaangatsigu pitsaasumik ikiuussinnaanissarput alloriarfigissagatsigu taavalu oqaatsit suut pisariaqartinneraat, Tula Thorsen Møller oqarpoq.
Akerleriissuteqarneq pitsaanerusumik aaqqiissuteqarfiusinnaasoq
Qaqortumi ilinniartitsisut atuartut akornanni nukersuunneq kisimik naammattoorneq ajorpaat. Sisimiuni meeqqat atuarfianni atuartut sakkortuumik pissusilersortartut naammattoorneqarsinnaasarput, taamaammat nukersortoqarnissaanut ilinniartitsisut unitsinissaminnut periaatsinik atugaqartarput.
- Tassa kisimiilluta soorunami atuartitsisaratta, inersimasumik allamik qaaqqusisarpugut, sapinngisamik marluuniartarpugut inersimasut, taavalu atuartunik allanik isersimasoqarsimappat taakkua anisittarpagut, ilinniartitsisumut allamut isertittarpagut, meeraq eqqissisimasumik najoruusaartarparput, ikummassarnaveersaarlugu, isersimaqatigeruusaaginnarlugu taava oqaasissaqarsimappat soorunami oqaloqatigisarparput, Dorthe Ivalo Jensen Sisimiuni ilinniartitsisoq oqarpoq.
Taassuma imminut illersorneq aaqqiissutissatsialaasoraa.
- Angajulliit sakkortugaangata sakkortoorujussuusinnaasarmata, isumaqarpunga aap, imminut illersorsinnaasariaqartugut, Dorthe Ivalo Jensen oqarpoq.
Ilinniartitsisut kattuffiata ilinniartitsisut imminut illersornissamut sungiusarneqartalernissaata atuutilersinnaa piareersimaffigaa.
- Ukiuni kingullerni malugineqariartorput meeqqat sakkortusiartortut, IMAK-ip siulittaasua, Birthe Møller Therkelsen oqarpoq.
AAMMA ATUARUK Meeqqat atuarfiini siusinaartumik iliuuseqartoqarli
Ilinniartitsisut eqqugaasartut
Atuartut sakkortutsissimangaarmata ilinniartitsisut imminut illersornissamut pikkorissarneqartalernissaat IMAK-ip nalilerpaa.
- Kissaatigineqarluni imminut illersornissamik pikkorissartalerusullutik, tunngavilersuutigalugu ullumikkut meeqqat sakkortuumik qisuariartartut amerligaluttuinnarmata, taavalu ilinniartitsisumut kinguneqartalermata, Birthe Møller Therkelsen oqarpoq.
Meeqqat sakkortuumik qisuariaateqartarnerat assigiinngitsupilussuuvoq, taamaammat ilinniartitsisut ilaatigut tiggunnermut akuleruttariaqartarput, tamannali ilinniartitsisunut kingunerluuteqarsinnaasarpoq.
- Assersuutigalugu immaqa unitsitsiniaaruttorlutik, atuartut paasut unitsinniarlugit ilinniartitsisoq arlaatigut innarliisoorsimassasoq unitsitsiniaanermi, taava ilinniartitsisoq pisuutinneqalerluni, siulittaasoq oqarpoq.
Imminut illersorneq ajortumik kinguneqartarneranik unikaallatsitsisinnaasoq
Birthe Møller Therkelsen naapertorlugu pisut sakkortunerat ilinniartitsisunut kingunerlussinnaasarpoq.
- Taava ilinniartitsisoq suliunnaarsinneqarpoq ullormiit ullormut, suliaq misissuiffigineqarami, taavalu taanna suliaq ukiup affaanik naleqarluni. Imaappoq ilinniartitsisoq ukiup affaa ilinniartitsisuusinnaanani pissutigalugu suliaq misissuiffigineqarami. Ilinniartitsisumut pineqartumut sakkortoorujussuuvoq, Birthe Møller Therkelsen oqarpoq.
Ilinniartitsisut ilaat meeqqat sakkortuulioraangata iliuusissaminnik nalornisarput, imminulli illersorsinnaanermik pikkorissartinneqaraluarunik meeqqanut unitsitsinissaminnut pikkorinnerulissapput.
- Tamakkua sakkussat pingaartorujussuupput piginissai, IMAK-ip siulittaasua, Birthe Møller Therkelsen erseqqissaavoq.
Taamaammat ilinniartitsisut kattuffiata imminut illersorsinnaaneq atuutsilerniarpaa.
- Neriuppunga siunissami piviusunngussasoq, oqarsinnaanngilanga ulluliisinnaalluta, kisianni angunigassatsinni IMAK-ip tunngaviusumik anguniagassaanut ilanngupparput anguniarneqassasoq ilinniartitsisut imminnut illersorsinnaalerumaartut siunissami, siulittaasoq oqarpoq.
Pikkorissaasarnerit atuutsilersinnaanissaa qanoq ingerlanneqassanersoq, kommunit sulisitsisutut IMAK-illu maanna oqallisigineqaleruttoq.