Ilinniartitsisut siulittaasortaaqqittut
IMAK-ip sinniisoqarfiata Ilulissani ataatsimiinnerani siulittaasumik nutaamik qinersisoqarpoq.
Siulittaasussatut sassartut aallartitanit 34-usunit aalajangiiffigineqartussat pingasuupput.
Siulittaasutullu qinerneqartoq tassaavoq Birthe Møller Therkildsen, Nuussuup Atuarfiani ilinniartitsisut sinniisuat IMAK-imilu siulersuisuni ilaasortaq.
Karl Frederik Danielsenip ilinniartitsisut kattuffiat 1300-t sinnerlugit ilaasortaqartoq ukiut marluk missaanni siuttuuffigereerlugu Nanortalimmi atuarfiup pisortaatut atorfimmi uterfiginissaanik aalajangernerata kingorna nutaamik siulittaasussarsiortoqarpoq.
AAMMA ATUARUK Ilinniartitsisut kattuffiat IMAK nutaamik siulittaasortaartoq
Birthe Møller Therkildsenip siulittaasup allaffianiileruni Namminersorlutik Oqartussanut akissaatit pillugit upernaaru isumaqatigiinniarnissaq immikkut samminiarpaa.
- Akissaatit pillugit nutaamik isumaqatigiissuteqarnissap isumaqatigiinniutiginissaa pingaarnerpaatippara. Ilaasortat toqqissisimanissaat pineqarpoq, IMAK-ip siulittaasortaava KNR-imut taama oqarpoq.
Birthe Møller Therkildsen 2008-mili ilinniartitsisunut sinniisuuvoq siulersuisunilu ukiuni kingullerni sisamani ilaasortaalluni.
AAMMA ATUARUK IMAK-imit ernumasoqarpoq
AAMMA ATUARUK IMAK: Ilinniarfissuaq er alt for svag