Nunanit allanit

EgyptAir-ip timmisartuutaa tassanngaannaq sangoriarluni tammarpoq

Igitsinimiut timmisartuat ilaasartaat ullaassaq periarfeerunneqartoq 11.000 meterinik qutsitsisumiilluni tassanngaannaq sangoriarluni qipilluni ammut aallarpoq, radarinilu nakkutilliissutinit takuneqarsinnaajunnaariataarluni. Grækenlandip illersornissamut ministereqarfia ullumi taama nalunaaruteqarpoq.

Allattoq Ritzau

maajip 19-at 2016 13:09

Nutserisoq Mads Lynge

Timmisartup nakkarnera qaammataasatigut assilineqarsimanera Grækenlandimiut assiitigigaat nalunaarutiginearpoq.

Timmisartup qeqertap Karpathosip kujataani imartamut nakkarnera sukumiisumik maanna misissuiffigineqalersoq, Grækenlandip illersornissamut ministeriata Panos Kammenosip oqaatigaa, sulili annerusumik paasisimasaqartoqarsimanngitsoq aamma nalunaarutigalugu.

Timmisartoq, Airbus 320-q, 66-inik issimasoqarluni Parisimit Kairoliartilluni nunatta ippassaq unnukkut nalunaaqutaa naapertorlugu aqqaninngulersoq periarfeerunneqarpoq.

Timmisartup teknikkikkut ajornartorsiuteqarsimasinnaanissaa immikkut ilisimasallit ilimaginngilaat, peqqarniisaarniartoqarneratigullu nakkartinneqarsimanissaa maanna ilimagineqalerluni. Franskit nutaarsiassaqartitsiviat AFP taama allaaserisaqarpoq.

Aamma atuaruk Timmisartoq ilaasartaat Akullersuarmut nakkartoq

Timmisartup peqqarniisaarnianit nakkartinneqarsimanera, Igitsinip ministeriunerunerata Sherif Ishmaelip aamma mattunnianngilaa.

Timmisartoq qaartartumeerinikkut nakkartinneqarsimassappat, qaartartoq Frankrigip timmisartoqarfiisa annersaanni Charles de Gaullemi qanoq ilinikkut timmisartumut eqqunneqarsimasinnaanersoq misissoqqissaarneqartariaqartoq oqaatigineqarpoq.

Frankrigip illoqarfiisa pingaarnersaanni siorna novembarimi peqqarniisaarniartoqareersorlu timmisartoqarfinni tamani isumannaallisaaniarneq taamanikkulli annertusineqareeraluarpoq.