Efterskolertut siunnersorti takulluartippaat

Efterskolertut Kalaallit Illuutaannut takkuttut 41-usut akornanni marluinnaat efterskolereerunik sunissaminnik nalornipput. Sinnerisalu siunissami sussanerlutik maannagaaq nalornisiginagu. Siunissamut pilersaaruteqalereersut aatsaat taama amerlatigisut ilinniaqqinnissanut siunnersortip, Pia Rosing Heilmann-ip oqaatigaa.

- Siornatigut nukillalaarnartaqaaq. Siorna pingasuinnaat gymnasiemi aallartinniarlutik pilersaarput. Sinnerisa naluaat suniarnerlutik. Taamaammat manna annertoorujussuarmik siuariarneruvoq, nuannaarluni oqarpoq.

Atuartut 75 procentiisa aalajangereersimaavaat Nunatsinni gymnasiemi ilinniartunngorniarlutik, sinnerilu - marluk eqqaassanngikkaanni - inuussutissarsiutitigut ilinniarfinnut qinnuteqassamaarput.

Godt to tredjedele af eleverne havde allerede afgjort, at de ville tage en gymnasial uddannelse i Grønland, og resten - pånær to - ville søge ind på erhvervsskoler.

Efterskolertut ilaat takkuttoq tassaavoq Isak Petersen  Ubby Fri- og Efterskole-mi ilinniartoq. Taanna oqarpoq efterskolemiinnini inuunermini misigisamini nuannernersaasoq.

- Assorsuaq nuannerpoq. Inuttut ineriartornarpoq aammalu ikinngutitaartornarluni, oqarpoq.

Taanna aamma Nuummi GU-mi aappaagu aallartinnissamik aalajangertut ilagaat. Peqataaninilu pissarsiffigilluarsimanerarpaa.

- Assut paasisaqarfigaara sunngorsinnanera, tamannalu maani siunertaavoq. 100 procentimik aalajanginngikkaluarpara suniarnerlunga, kisianni sanasunngornissara siunniuppara, oqarpoq.

Ilinniartitaanermut siunnersorti Pia Rosing Heilmann neriuppoq ullumikkut takulluarnerminnertik Atuarfitsialaap iluatsikkiartorneranut takussutissaasoq.

- Immaqa Atuarfitsialammi atuarnerup ingerlanerata nakkutiginera ingerlaqqinnissallu pilersaarusiorneqartarnera inuusuttut sunngornissamik nalorninnginnerulernerannik kinguneqarpoq. Taamaassimassappat tamanna ajunngilluinnarpoq, oqarpoq.