East Greenland Codfish politiinut nalunaarutigineqarpoq
Aalisartoq kalaaleq 31-nik ukiulik, umiartornermik misilittagaqanngitsoq imarsiornermilluunniit ilinniagaqanngitsoq ammassanniarluni kilisaammi Erikami sulivoq, kilisaatillu lastia ulikkaarmat siorna februaarip ulluisa 27-anni Islandimi Helguvikiliarpoq.
31-nik ukiulik qalorsuit ujarattaannik oqimaaluttanik katersitilluni angallat uerujussuarmat qalorsuarnit eqqortilluni avammut nakkarpoq.
- Kilisaatip ungaluisa ilai kilisaataatillip peersimavai, tamannalu ajunaarnermut pissutaavoq. Aalisartoq umiarsuup qaavanut nakkaannarsimasinnaagaluarpoq, ungaloqanngimmalli immamut nakkarsimalluni, Imarsiornermik Qullersaqarfimmi inatsisilerituut qullersaat, Finn Tikjøb, KNR-imut nassuiaavoq.
Kilisaammi qalorsualerisoq allunaasamik qitermiulerluni imaanut pissippoq, 31-nillu ukiulik minutsit arlaqanngitsut qaangiummata qaqillugu, uummarsaanerigaluarli iluatsinngilaq.
Kilisaataatillip Imaani Ajunaartoqartillugu ataatsimiititaliamut nassuiaanerani takuneqarsinnaavoq qassutit pillugit umiarsuup ungaluisa ilai peerneqarsimasut.
Imarsiornermik Qullersaqarfiup tamanna tunuliaqutaralugu East Greenland Codfish upalungaarsimanissamik malittarisassanik unioqqutitsisimasutut politiinut tunniuppaa.
Malittarisassalli allat ajutoornermi aamma unioqqutinneqarsimapput. Suliffimmi avatangiisit ulorianaateqarsinnaasut pillugit kilisaataatillip iliuusissatut pilersaaruteqarsimannginnera, Imarsiornermik Qullersaqarfiup aamma taakkartorpai, naak tamanna inatsisitigut pisussaaffiugaluartoq.
Imarsiornermik Qullersaqarfiup East Greenland Codfishimik politiinut tunniussinera politiinit maanna nalilersorneqassaaq, suliarlu ingerlateqqinneqassanersoq aalajangiivigineqarumaarluni.
Angut 31-nik ukiulik umiartornermik misilittagaqanngitsoq imarsiornermilluunniit ilinniagaqanngitsoq kilisaat Erika qaammat ataaseq sioqqullugu ikkivigaa, kilisaallu kalaallinit ukiut pingasut matuma siornatigut pigineqalerluni.
