DTU: Villumsen soraarsitaanngilaq
- Centerimi aqutsisutut tunuarpoq. Kisianni Arne Villumsen DTU-mi professoriuvoq, taamatullu inissisimassalluni nammineerluni soraarninngorumatsannissami tungaanut, Martin E. Vigild oqarpoq.
Kisianni ARTEK-imi aqutsisoqatigiinni siulittaasutut manna tunuartup, Michael Binzerip, Radioaviisimiit oqaloqatigineqarluni oqarpoq, aqutsisoqatigiit tallimanngormat kingullermik mail-ikkut allagarsisimasut, professori ARTEK-imi aqutsisutut atorfimminit soraarsitaasoq.
Professor Arne Villumsen ARTEK-imi, tassa DTU-p ataani Center for Arktisk Teknologimi, ukiut qulit sinnerlugit aqutsisuuvoq, ilaatigut issittumi ingeniørinngorniarfimmik Sisimiuniittumik ineriartortitseqataasimalluni.
Kisianni tassa ARTEK-imi kinguaariit maanna paarlaatissasut, Martin E. Vigild oqarpoq:
- Kinguaariit paarlaannissaat, Arne Villumsenip tunuarnissaminik nammineq kissaateqarfigisaa, ilisimaneqareerpoq. Tassaluuna tamanna pisussaq ukioq manna 2012-imi. Tassalu soraarsitsisoqanngilaq. kinguaariinukua paarlaannerat pineqartoq, Martin E. Vigild oqarpoq.
Professor Arne Villumsensillu ARTEK-imiit tunuarnera Sisimiuni Sanaartornermut Ilinniarfiup pisortaata, Jokum Møllerip, professorimik ukiuni 14-ini suleqateqarsimasup uggoraa:
- Uggornaqaaq, ukiuni 14-ini suleqatigereerlugu. Kisianni uagut maanngaanniit allatut ajornartumik isiginnaaginnarsinnaavarput, taamatut DTU-p iluani pissutsit pissutigalugit tassunga killeqartariaqarmat, Jokum Møller, taama oqarpoq.
DTU-milu ARTEK-imi aqutsisussamik nutaamik ujarlertussanngorput:
- Inuk ARTEK-imut ukiut qulit sinnerlugit taama tunniussaqarsimatigisoq, aqutsisutut atorfimmini taarserneqarumalluni kissaateqarpat, taava kukkunerussaaq suliassaq ilumoorullugu suliarinngikkaanni, kinguaariillu parlaannissaat pimoorullugu iliuusissatut pilersaarusianut ilanngutinngitsoorlugu. Taamaalilluni aatsaat ukiut qulit siulliit iluatsitsiffiusut ukiunik qulinik aamma iluatsitsiffiusunik malitseqarniassammata, Martin E. Vigild oqarpoq.
Center for Arktisk Teknologimut, ATEK-imut, pingaarnerpaamik akisussaasoq, DTU-p sanaartornermut tunngasunut immikkoortortaani pisortaq, Michael Havbro Faber, Radioaviisimut annerusumik oqaaseqarumanngilaq, suliamut qanippallaarnini pissutigalugu.
