Dronninngi: Silap pissusaata allanngoriartorneratigut kalaallisut inuunerup ilaa qaangiuppoq
Dronning Margrethe tusagassiortunik Katuami ippassaq katersorsitsinermi ima oqarpoq:
- Siunissami ungasinnerusumi qanorpiaq kinguneqassanersoq oqaatigineqarsinnaanngilaq. Kisianni erseqqippoq; silap pissusaata allanngoriartornera kinguneqarpoq, tamannalu Kalaallit Nunaaata allanngorneranik kinguneqassaaq, ataqqinartorsuaq oqarpoq nangillunilu:
- Kalaallisut inuunnerup ilaa - Danmarkimi amerlasuujulluta aamma Kalaallit Nunaannut ilisarnaatigitittagarput; qimussit sikumilu qimmerpassuit - sumiffinni arlalinni qaangiuppoq. Tamaniunngitsoq, naamerluinnaq - kisianni sumiffinni arlalinni. Tassalu nalunanngilluinnarpoq, silap pissusaa tamatumunnga pisuuvoq, Dronningi oqarpoq.
Tassalu slap pissusaata allanngoriartornerata Nunarpoq qanoq sunneraa, kunngikkormiut ukioq manna aasaanerani angalanerminni ilisimasaqarfiginerulerpaat.
- Uummannami oqaluttuunneqarpugut, qimmit qimuttoqatigiit arlallit toquttariaqarsimagaat, sikumi qimusserluni angalanissamut atukkat pitsaasuujunnaarmata. Tassalu kalaallisut inuunerup ilaa tamaanga killeqarpoq, Dronning Margrethe oqarpoq.
Naallu kalaallisut inuunnerup ilaa Dronninngip oqarneratut tamaanga killeqaraluartoq, Dronningi isumaqarpoq, kalaallit pinngortitamut pissusertik attatiinnassagaat:
- Kalaallillu pinngortitamut qanittumik pissuseqarnertik attatiinnarusuppaat. Aammami aamaassangatippara. Tassami nunarujussuarmi maani silap peqqarniiffigisaani - naak sila allanngoriartoraluartoq - inuuniarneq inuinut suli unammillernartupilussuussaaq. Tassalu silap allanngoriartornera, aammalumi taamaareernera; immap annertunersua, masannera peqqarniinneralu qaqqallu portuneri, tujornimanrneri najoruminaannerilu, Dronninngi oqarpoq.
Taassumalu upperaa, silap pissusuata allanngoriartorneratigut unammilligassat Nunatta sapinngikkai.
- Oqaannaraanni, pissutsit qangatut ikkunnaarnerat erloqinaqisoq, taava ingerlariaqqittoqarsinnaanngitsoq, isumaqarpunga. Pissutsillu allanngoriartormata, ajornartorsiutaalersussat qanoq iluarseriarnissaat misissorneqartariaqarpoq. Upperaaralu, tamanna kalaallit ilisimaarilluinnaraat. Aamma upperaara, pissutsit maanna atuuttut nalaanni qanoq inooriaaseqarnissaq eqqarsaatigeqqinnaarneqartoq, Dronninng Margrethe tusagassiortunik ippassaq katersortitsinermi oqarpoq.
