Dronningip ukiortaamut oqalugiaammini Nunarput eqqaavaa

"Ukioq manna Kalaallit Nunaata namminersorneq pillugu aaqqissuussinerup nutaap eqqunneqarnera nalliuttorsiutigaa. Uannut, uinnut aamma Kunngissakkunnut misigisaavoq angisooq, ullormi inuiattut ullorsiornermi 21. juni peqataasinnaasimagatta. Misigisimavarput nuannaarutigineqartoq, aamma tulluusimaarnerup kalaallit inuiaat sunnersimagai, taamatullu siunissami suliassat nutaat aallartinneqarnissaannut annertuumik piumassuseqarneq, ulluni taakkunani assut malunnarsimavoq. Qujassutigiumavarput kissalaartumik tikilluaqquneqarsimanerput, Kalaallit Nunaat inuiaallu kalaallit siu-nissami ajunngitsunik tamanik kissaappagut. Tamassi qamannga pisumik ukiumi nutaami ajunngitsunik tamanik kissaappassi".

Ataqqinartorsuaq, Dronning Margrethe, 38-issaaneerluni oqaluguarami ualeq manna pisumi Nunarput pillugu taama oqarpoq.

Dronninngip oqalugiarnermini Kalaallit Nunaannut Savalimmiunullu inuulluaqqusinerup saniatigut ilaatigut aamma silap pisusiata allanngoriartornera ilaqutariittullu misigisimaneq sammivai. Ukiuni 20-ni kingullerni ineriartorneq sukkasimaqisoq, Ataqqinartorsuup oqalugiammini aamma ersersippaa, ukiunilu makkunani inuusuttuunermik aallussinersuq tikkuarlugu.

- Misilittakkat nalitoorujussuupput, ukiumigullu inuusukkunnaarsimasoq aamma inissaqartariaqarpoq, aamma inuusuttuunermik aallussinerujussuup aqqani siusissukkut utoqqalilernerup allannguutaanik atugaqalersut katassanngilagut.

Droninngilli oqalugiaammini nunarsuaq tamakkerlugu aningaasarsiornikkut ajornartorsiornerup kinguneri pingaartinneruai.

Ajornartorsiorneq amerlaqisunut eqquivoq, ukiorpassuarnilu pissaqaleriartuinnarfiusup kingornani killilersimaarnissamut inatsivoq.

Suliffeqarneq suliffiullu pigiinnarnissaa naliginnaajuinnaarpoq.

Aammali Tamatuma inuuneriaatsitsinnik eqqarsaqqinnissamut unikaallannissamullu periarfissippaatigut. Immaqami aamma arriilliiminissaq, piffissamut matumunnga iluarusunnissaq, qanigisanik najorteqarnissaq peqqinninaannassaaq, Drongionngi oqarpoq, siunissamullu neriunnermik oqalugiaatinik naggaserlugu

- Eqqasuutaasinnaasut uniffigissanngilagut. Tamatigut nutaanik unammilligassaqartuartarpoq aamma inuusuttunut utoqqarnullumi nutaanik periarfissaqartuartarpoq.

Peqatigiilluta unammilligassagut naapitsigit periarfissallu saqqum-mersut atorluartigit. Unnuk manna ukiumut nutaamut kissaassis-sutikka taakkuupput.

Guutip tamatta ukiortaamik nuannersumik atugaqartillitigut.