Dronningip nalliuttorsiutigineqarneranut Kuupik peqataassanngilaq
Naalakkersuisut siulittaasuat Kuupik Kleist dronning Margrethep 70-inik ukioqalerluni inuuissiorneranut atatillugu nalliuttorsiornissamut peqataassanngilaq.
Allattoq Louise M. Kleemann
Kunngikkormiutut ataqqinassusilinnit pisortatigoortumik qaaqqusisoqartillugu naalakkersuisut siulittaasuat inatsisartullu siulittaasuat ileqquusoq malillugu peqataasarput. Kisianni dronning Margrethep apriilip 16-iani 70-inik ukioqalerneranut atatillugu nalliuttorsiornissamut Kuupik Kleist peqataassanngilaq.
Sermitsiaq.ag-mi allaaserineqartoq naapertorlugu inatsisartut upernaakkut ataatsimiinnissaat Kuupik Kleistip nalliuttorsiornermut peqataasinnaannginneranut tunngaviuvoq.
Josef Motzfeldt Kalaallit Nunaat sinnerlugu pisortatigoortumik kisimi peqataasussanngortoq, Atuagagdliutini allaaserineqarpoq.