Dronninge: kalaallit imminnut tatigipput ineriartornissamullu piumassuseqarlutik
Kunngikkormiut nunatsinni sapaatit akunnerini marlunni angalanerminni killiffitsik pillugu takusatik misigisatillu Nuummi tusagassiortunik katersortitsinermi oqaluttuaraat.
Nunatsinni angalanerminni ajunngitsumik kissalaartumillu pineqarnertik oqaluttuaraat, aamma kalaallit nunaanni kalaallilu ineriartornerat malugisimallugu takusinnaallugulu unnersiorput.
Dronning Margrethe siullermik nunatsinniippoq 1960-imi uia Prins Henrik 1970imi siullermik nunatsinniilluni, taamattumik ukiut 50it 40illi sinnerlugit marluulllutik Kalaalliit nunaani ineriartorneq malinnaaffigaat.
"Kalaallit Nunaani inuuniarnermi iluatsitsinissaq isumalluarneq minnerunngitsumillu piumassuseq pigineqarpoq iluatsinissaalu innutaasunit ilisimaneqarpoq", Dronning Margrethe ualimut tusagassiortunit katersortitsinermi oqarpoq, "inuiaqatigiinni tamanna ilutsissinnaasoq takuneqareerpoq ilisimaneqarlunilu ", Dronning oqarpoq.
Prins Henrik kalaallit nunaanni ineriartornerup killiffia pillugu oqarpoq, inuiaqatigiinni malunniuteqarnissaq piumassuseqarfigineqarpoq, tamannalu ataqqineqartariaqarpoq nersorneqartariaqarlunilu, Prins Henrik oqarpoq.
Kalaallit Nunaat aamma kalaallit kunngikkormiuni qanoq oqaluuserineqartartiginersoq apeqqutigineqarmat, Dronning Margrethe ima akivoq:
" Kalaallit Nunaat kunngikkormiuni oqaluuserineqartuartarpoq tikeraartarnigut maanna arlalissunngortut nuannarutigiuaannartarpagut, Kalaallit Nunaat pillugu eqqaamasassarpassuaqarpoq, angerlarsimaffitsinni kalaalit nunaannit pisunit pigisaqarpugut aamma atortakkatsinnik, taamaattumik Kalaallit Nunaat qaqutigut eqqaaneqariasaarneqarneq ajorpoq, Kalaallit Nunaat ulluinnarni inuunitsinni ilaavoq ", Dronning Margrehe Katuami tusagassiortunik katersortitsinermi ualimut pisumi oqarpoq.
Dronning Margrethe Prins Henrillu ullumi Nuummi pisut allarneqarpaat, Annaassisitta oqalufffiani naalagiarnermik. Kingorna kommunip allaffiani nereqatigiittoqarpoq, nereqatigiinneq suli naamassinngitsoq, Prins Henrik Nuummi kalaalimineerniarfimmut alakkaavoq, tassani tuniniarneqartut qimerloorpai, suunerilu apeqqutigisarlugit. Puisip neqaa tingua niisallu mattai nalunngilluarpai, tassanneereeramilu Hans Egedep illuani igajartorpoq, tassani igaqatigaa Ane Sofie Hardenberg. Ammassaat tunuminngaaneersut iffiorfikkut siatassanngorlugit piareersarpaat, aamma aqissit igaassatik piareersaraat, qimappagut. Dronning Margrethe eqqumiitsuliortut peqatigiiffiata KIMIUP sannavianut avannarlernut alakkaavoq, tassani eqqumiitsuliortut Arnannguaq Høegh, Maria Paninnguaq Kjærulff Ivalo Abelsen Naja RosingAsvidilu suliatit Dronningimut takutippaat oqaluttuaralugillu.
Dronning Margrethe Prins Henrillu Nuummi aaqqissuussinermi pisut kulturikkut illorsuarmi Katuami naggaserpaat, innutaasunut kaffisortitsisoqarnerani peqataapput, tassani Nuummi aliikkusersuisartut isiginnaartitsisartullu peqatigiffiata NAIP-ip meerartai kalattut qitinnermik takutitsipput, erinarsoqatigiinneqarluni, nersornaasiisoqarluni. Larsine Tobiassen nersornaammik sølviusumik Dronningimit nersornaaserneqarpoq, inuppassuarnit nuannaarutigineqartumik.
Dronning Margrethe Prins Henrillu aqagu pisortatigoortumik suliaqassanngillat. Marlunngorpat Paamiunut tikeraassaapput.
