Dronning Margrethe nunatsinni nalliussineqarpoq

Ataqqinartorsuaq Dronning Margrethe aappaat ullumi 70-inik ukioqalerpoq. Ulloq malunnartinniarlugu Nuummi ullumi ullup qeqqanut Nuutoqqami qamutilittartoqassaaq.
Allattoq Elisa Isaksen
apriilip 16-at 2010 06:44

Qamutilittartoqareerpat Kommuneqarfik Sermersuumi borgmesteri, Asii Chemnitz Narup oqalugiassaaq, kinguninngualu erinarsoqatigiit Qissiat erinarsussavaat "Nuilersup qilaap seqinersuata".

Tamatuma kingorna Nuutoqqamut takkuttut erinarsoqatigiissapput.

Sinerissamik alapernaarsuutit, Tulugaq aamma Knud Rasmussen politiit angallataat sisamat aamma angallat H.J. Rink Nuup saavani nalliuttorsiornermi peqataassapput.

Kommunit sinneri Dronningip inuuiani immikkut malunnartitsiniaratik KNR-imut oqaatigaat.

Kalaallit Nunaanniit tunissutigissavarput qalipagaq taaguuserneqarsimasoq "Arnap sullivia", taanna eqqumiitsuliortumit Niels Motzfeldtimit qalipagaavoq.

- Qalipakkap ersersinniarpaa, arnap utoqqasaanngulersup ilisimasai misilittagaalu, Niels Motzfeldtip qalipakkani pillugu KNR-imut taama oqarpoq. Qalipakkap aamma oqaluttuariniarpaa kalaalerpalussuseq, taamaattumik nerrivik avittarnermi atorneqartartoq qalipakkami ilaatinneqarpoq.

20 koruuninut aamma 10 koruuninut assiliartaliunneqarsimasut Niels Motzfeldtimit aamma suliarineqarsimapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq