Dronning Ingrid-ip Peqqissaavia eqqumiitsuliortup kusassarpaa
Nakorsiat allallu Dronning Ingridip Peqqissaavianukartussat isigisassaqarnerulaalerput. Siornatigut iigaq qaqortuinnaasimasoq maanna Anne-Birthe Hove eqqumiitsuliaanik kusassagaavoq. Eqqumiitsuliami timip ilusai kusanartut ilusilersorneqarput.
- Inuit amerlasuut takusartagassaannik suliaqarneq nuanersuuvoq. Kigartukkanik assilialiarisartakkannit annerusumik suliaqarneq, timitsinnilu ilutsinik tupinnartunik assigiinngitsunik paasisassarsiorneq nuannersutut misigaara, Anne-Birthe Hove oqarpoq.
Namminersorlutik Oqartussat Anne-Birthe Hovep suliaa tusagassiorfeqarfinnut nalunaarumminni ima eqqaavaat:
’Eqqumiitsuliortup inuup timaata katitigaanera pingaarnertut isumassarsivigalugu suliaq qisuusoq ilusilersuiffigaa. Eqqumiitsuliami inuup sananeqaataani kingornuttakkanut tunngasut kromosomit, aap akui qaqortut timillu pisatai naasutut allanartatut isikkullit takussaapput. Siutip ilorpiaata kusanassusaa taamatullu naartoq inerilluinnalersoq, erlippaat allarpassuillu takutinneqarput. Tupaarnat qilertat nakorsaatitaqarneri ilisimaneqartut eqqumiitsuliami ilaapputtaaq, isiginnaartumullu illup nuna tamakkerlugu nakorsaataasivittaqarneranik eqqaasitsisuullutik.’
Anne-Birhte Hove siullermeerluni peqqinnissaqarfimmut eqqumiitsuliulinngilaq. Suliai allat Dronning Ingridip Napparsimavissuani toqusut inaanni tarnimikkullu nappaatillit immikkoortortaqarfianni A1-imi takussaapput.
Eqqumiitsuliaq A.P. Møllerip nuliatalu Chastine Mc-Kinney Møllerip siunertanut nalinginnaasunut aningaasaateqarfiannit aningaasaliinikkut nutaamik peqqissaavittaarnermut nunalu tamakkerlugu nakorsaataasivittaarnermut piviusunngortitsisunut qujassummik eqqaassutissamik allagartalerneqarnermigut piffissami qaninnermi naammassissaaq.
