DR-imi tusagassiortoq: Jens B-p tunuarnera Aleqamut nukittorsaataassaaq

2009-mi Inatsisartunut qinersinermi, Inuit Ataqatigiit qinerneqarluarnerisa kinguneranik, Demokraatit, Inuit Ataqatigiit aamma Kattusseqatigiit Partiiat Naalakkersuisuutitaqalernissamik isumaqatigiipput. Naalakkersuisooqatigiinneq 2013-p tungaanut attanneqarluni.

Inatsisartunut qinersinermi 2013-imi Siumup qinerneqarluarnerata kinguneranik Inuit Ataqatigiit Demokraatillu illuatungiliuttunngorput.

Jens B. Frederiksenip partiimi siulittaasutut Inatsisartunilu ilaasortatut tunuarnerata kingorna, illuatungiliuttut nukilaannerulinnginnissaannut, Jens B. Frederiksenip taartissaasa sulinerat apeqqutaassasoq, Kuupik V. Kleist naliliivoq.

- Soorunami maanna nalileruminaappoq Jens B. Frederiksenip kingoraartissaasa, paartiimi siulittaasutut aamma Inatsisartuni ilaasortatut, suliassatik qanoq ingerlakkumaarneraat, Kuupik V. Kleist oqarpoq.

Jens B. Frederiksenip tunuarnerata kingorna illuatungiliuttut nukilaannerulernissaat, Danmarks Radiomi tusagassiortup, Kalaallit Nunaannilu politikkimut malinnaalluartup, Kirsten Rosingip nalilerpaa.

- Jens B. Frederiksen aamma Palle Christiansen arlaannik isornartorsiuigaagata nalornisigineqarneq ajorpoq, suna pineqarnersoq. Taakku inuit marluk Demokraatiniikkunnaarnerisa kingunerinngitsoornavianngilaa illuatungiliuttut nukilaannerulernissaat, tusagassiortoq Kirsten Rosing oqarpoq.

Jens B. Frederiksenillu partiimi siulittaasuujunnaarnera aamma Inatsisartuni ilaasortaajunnaarnera, Naalakkersuisuutitaqartunut ingammillu Aleqa Hammondimut nukittorsaataassasoq, Kirsten Rosing naliliivoq.

- Uppernarsivillugu oqaatigisinnaanngikkaluarlugu isumaqarpunga Jens B. Frederiksenip sulinunnaarnera, Aleqa Hammondimut taassumalu naalakkersuisuinut nukittorsaajumaartoq. Aleqa Hammondip amerlanerussuteqarnera maanna annikittuaraavoq, taamaattumik illuatungiliuttut nukilaannerulerneri Aleqa Hammondimut iluaqutaassasoq ilimanarpoq. Danmarks Radiomi tusagassiortoq, Kirsten Rosing naliliivoq.

Inuit Ataqatigiit siulittaasuata, Kuupik V. Kleistip oqaatigaa, Jens B. Frederiksen Nunatsinni politikkikkut nutaalioqataasimasoq imalu nangilluni oqarluni.

- Isumaqarpunga Jens B. Frederiksen annertuumik sunniuteqarsimasoq. Naak taassuma naalakkersuinikkut isummersortarnera tamatigut isumaqatigisanngikkaluarlugu, isumaqarpunga Demokraatit partiitut pilersinneqarneri Nunatsinnut eqeersaataasoq. Taamaattumik Jens B. Frederiksen qujassuteqarfigerusuppara, annertuumik suleqatigiissimanerput pillugu. Inuit Ataqatigiit siulittaasuat, Kuupik V. Kleist taama oqarpoq.