Dorisip Søvndal nassuiaateqaqquaa

Danmarkimi nunanut allanut tunngasunut ministerip Villy Søvndalip oqaatigimmagu, Kujataani saffiugassanik qaqutigoortunik piiaanissaq naalagaaffeqatigiit akisussaaffigigaat, Siumup folketingimi ilaasortaatitaata Doris Jakobsenip ministerip nassuiaanissaa kissaatigaa.

Villy Søvndalip kingullermik Nunatsinniinnermini oqaatigaa, saffiugassat qaqutigoortut atortussiassanut sakkussiornermi atorneqarsinnaasunut ilaasut, taamalu sakkutuut sakkuinut atortorissaarfioqisunut atorneqarsinnaallutik. Taamaattumillu tamakkuninnga piiaanissaq naalagaaffeqatigiit akisussaaffigigaat, tassami Naalagaaffeqatigiit nunanut allanut isumannaallisaanermullu politikkiat Danmarkip suli akisussaaffigimmagu.

Nunanut allanut tunngasunut ministerip taamani oqaatigaa, Kina saffiugassanik qaqutigoortunik kisermaassilluni niuertutut ullutsinni oqaatigineqarsinnaasoq, taamalu akinut tunngasut kikkunnullu tunisisoqassanersoq nammineq aalajangersartarlugit.

Maannali Doris Jakobsen Villy Søvndalimut saaffiginnissutimini allappoq, saffiugassanik qaqutigoortunik niuerneq nunani tamalaani killilersorneqanngitsoq - tamakkumi teknikkikkut atortorissaarutini assigiinngitsuni atorneqartarmata - soorlu oqarasuaatini angallattakkani, anorisaatini nukissiuutini aamma seqernup qinngornerinik tigooraassutini atorneqartarmata.

- Taamaattumik isumalluut qaqugukkut sakkussiornermut pingaarutilittut isigineqassanersoq, nunanut allanut tunngasunut ministerip, Danmarkimi naalakkersuisut sinnerlugit nassuiartariaqarpaa. Pisormi kalaallit aatsitassarsiorniarnerannut Danmarkip nakkutilliiniarneratut oqaatigineqarsinnaammat, Doris Jakobsen erseqqissaavoq. Tassuma aamma oqaatigaa, savimineq aamma sakkussiornermut atorneqarsinnaasoq.