Doris Jakobsenimut tatiginninnginnermik taasititsineq amerlanerussuteqartut itigartippaat

Oqaluuserisassani immikkoortoq 115 matumani tunuliaqutaavoq.

Tassa pinartumik napparsimasoqartillugu ilaqutaasut Københavnimi kalaallit peqqissartut najugaqarfianni ineqartinneqartillugit ineqarnermut aningaasartuutit 2016 aallarnerfigalugu pisortanit akilerneqartalernissaat sulissutigeqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut.

Oqaluuserisassatut siunnersuut Inatsisartut ukioq manna upernaakkut ataatsimiinneranni siullermik saqqummiunneqarpoq, siunnersuummullu tunngatillugu misissugassaqarnera pissutigalugu Naalakkersuisunit kinguartinneqarluni.

Inatsisartullu ullumi ataatsimiinnerannni Naalakkersuisut oqaatigaat siunnersuut aamma kinguarteqqinneqartariaqartoq.

- Inuit Ataqatigiinninngaanniit paasivarput Naalakkersuisoq piffissami pissutsinut assigiinngitsunut qulaajaanissamut atorneqartussamut suliaqarsimanngitsoq. Naalakkersuisup neriorsuisimanini eqquutinngilaa aammalu akisussaaffini naammassisimanagu. Inuit napparsimaruluttut kiisalu ilaqutaasut taama utaqqilutsinneqarnissaat akuersaarneqarsinnaanngilaq. Naalakkersuisup ilatsiinnarsimanera kinguneqartinneqartariaqrpoq, Agathe Fontain oqarpoq.

Siunnersuutip aningaasatigut kingunissai sukumiinerusumik ilisimaneqanngitsut, Naalakkersuisup, tassa Doris Jakobsenip oqaaseqaateqarnermini ilaatigut oqaatigaa, 18 millionit koruuninilli naleqarnissaa naatsorsuutigigitsik oqaatigalugu. Angalanissamut aningaasartuutissat siunnersuummut atatillugu kommuninut amerlinissaat aamma naatsorsuutigineqarpoq.

Taamatulli nassuiaasoqarnera Agathe Fontainip akuersaarumanngilaa:

- Angalanissamut aningaasartuutit siunnersuummut atatillugu pingaaruteqanngillat, Agathe Fontain oqarpoq.