Doris Jakobsen ataatsimiititalianut sisamanut inissippoq
Nunanut allanut tunngassuteqartunut ataatsimiitaliami, Eqqartuussiveqarnermut ataatsimiititaliami aamma Illersornissamut ataatsimiititaliami ilaasortanngorpoq, Kalaallit Nunaannullu tunngassuteqartunut ataatsimiititaliami siulittaasumut tullinngorluni.
Kalaallit Nunaannut tunngassuteqartunut ataatsimiititaliami Sara Olsvig, Inuit Ataqatigiinneersoq siulittaasunngorpoq.
Ataatsimiititaliat ilaasortaaffigilikkani Doris Jakobsenip naammagisimaaqai. Ataatsimiititaliat Namminersorlutik Oqartussanit suli tiguneqanngitsut Siumumit inuttalerniarneqarsimapput.
Nunanut allanut- illersornissamullu ataatsimiititalianut aamma inatsisinut atortitsinermut ataatsimiititaliamut sunniuteqarnerunissartik, Siumumit qineqqusaarutigilluarpaat.
Kalaallit Nunaannut tunngassuteqartunut ataatsimiititaliap Inuit Ataqatigiinnit siulittaasuuffigineqarnissaa Siumup taperserpaa, Folketingimummi siornatigut ilaasortaq, Lars-Emil Johansen, Siumut, qinersivimmi kingullermi tassani siulittaasuummat. Siulittaasutut atorfik kalaallit Folketingimut ilaasortat paarlakaajaallutik siulittaasuuffigisassagaat Siumumit taperserneqarpoq. Tusagassiuutinut nalunaarummi taama allassimavoq.
