Doris Folketingimut qinigassanngorteqqinnianngilaq

Partii Siumut tusagassiorfinnut nalunaaruteqarluni taama ilisimatitsivoq. 

Doris Jakobsen taamaalilluni peqqissutsimut nunanillu avannarlernik suleqateqarnermut naalakkersuisutut atorfimminut   utertussanngorpoq. Sulinngiffeqarnerani Martha Lund Olsenip ilaqutariinnermut, naligiissitaanermut inunnillu isumaginninnermut naalakkersuisuunermi saniatigut Doris Jakobsenip naalakkersuisuuffigisai isumagai. 

Tamannalu pivoq Nick Nielsenip Folketingimut Siumumit ilaasortaajunnaarsinneratigut Doris Jakobsen nunatsinni naalakkersuinikkut sulinerminit februaarip qaammataani sulinngiffeqarluni Folketingimut utermat.

Angalanerit pisariusut
Doris Jakobsen Folketingimut septembarimi 2011-mi kingullermik qinigaavoq, ilaatigullu Nunatsinni eqqartuussiveqarnerup iluani pissutsinik pitsanngorsaanissamik aammalu amerlanerusunik aningaasaliisoqarnissaanik sulissuteqarsimalluni. Aammattaaq arfattassiissutit pillugit suliat EU-milu puisit amii pillugit suliaq, suli ingerlasoq, Doris Jakobsenip Folketingimi qaqissimavai.

Tusagassiorfinnut nalunaaruteqarluni allappoq Folketingimiinnerminut aammalu politikerinik kalaallinik danskinillu suleqateqarnerminut qujassutissaqarluni. Folketingimili sulinermut atatillugu angalasarnerpassuit inituallaarsimapput, pingaartumik ilaquttani eqqarsaatigalugit.

- Folketingimi sulinerput pissanganarsimaqaaq, taamaattorli aamma ilaquttannut piumasaqaaterpassuaqarsimalluni. Pingaartumillu Nunat Allat pillugit Ataatsimiititami angalanerpassuavut initusimaqaat. 

Taamaakkaluartoq Doris Jakobsenip qinigaasut nunanut allanut angalasarnernut annertunerusumik peqataasarnissaannik kaammattuuteqarpoq, pingaartumik nunanut allanut tunngasunut ataatsimiititaliap angalasarneri eqqarsaatigalugit, ilaasortammi atlantikup avannaaneersut angalasarnernut ullumikkut aalajangersimasumik peqataatinneqarneq-ajormata:

- Nunat Allat pillugit Aalajangiisartut Naalagaaffiup Nunanut Allanut politikkia ilusilersueqataaffigisarpaat, taamaammat isumaqarpunga Kalaallit Nunaat Savalimmiormiullu angalasarnerni aalajangersimasumik peqataatitaqartuartariaqartut. Ullumikkut taamaanngilaq, neriuutigaaralu tamaa ilinissaat Folketingimut qinigaasut sulissutigiumaaraat, Doris Jakobsen tusagassiorfinnut nalunaarummi taama allappoq.


Naalakkersuisutut anguniagassarpassuit
Doris Jakobsen Peqqissutsimut Nunanillu Avannarlernik suleqateqarnermut Naalakkersuisutut sorpassuarnik angunigassaqarnerarpoq: 

- Peqqinnissaqarfinni unamminartut iluarsisassallu suli amerlaqaat, soorlu misissuinerit pitsaanerulernissaat, nunatsinni katsorsarneqartartut amerlinissaat, peqqinnissaqarfinni ilinniagassat amerlineqarnisaat, anniaatinik millisaasarnerit pitsaanerulernissaat minnerunngitsumillu toqujartortut immikkut ineqartitaasalernissaat.

Siumup Folketingimut qinigassanngortitassani ullumi sisamanngornermi avammut nalunaarutiginiarpai.