Doris aamma Johan Qallunaat naalakkersuisuinut assuarinnipput

Johan Lund Olsenip oqalugiarnermini oqaatigaa, Naalagaaffeqatigiinneq pitsaasumik ingerlanneqartoq, taamaattorli urani pillugu Nunarput Danmarkimut annertuumik suli sorsuttariaqartoq oqaatigalugu.

Naalagaaffeqatigiinnerup aallartinneranit aatsaat taama ajornartorsiuteqartoqartigisoq aamma ataqqeqatigiinngitsoqartigisoq, Doris Jakobsen oqalugiarnermini eqqaasaasa ilagaat.

- Nalunngilarput arfanniarnerup tungaatigut qanoq killilersugaatiginerluta, nalunngilarput puisit amiisa Europamut tunisaaniarneri qanoq killilersorneqartigisut aamma ilisimallutigu aatsitassarsiornermut tunngatillugu urani eqartorneqaleraagat Qallunaat qanoq akisussaaffimmik tigusiumanngitsiginersut.

Tassalu tamakku tunngavilersuutit, Doris Jakobsenip oqalugiarnermini eqqartugaasa ilaat.

Taamali oqareerluni Socialdemokraatit suleqatiginerat ajunngitsumik ingerlasoq erseqqissaatigalugu.

Johan Lund Olsenip oqalugiarnini aallarnerlugu isertuunnagu oqaatigaa, qallunaat naalakkersuisuisa aningaasanut inatsisaannut siunnersuutaat pakatsissutiginerarlugu. tassa Nunatsinni pingaartutut isigisagut soorlu Eqqartuussiveqarnermut tunngasut, kalaallit Danmarkimi inuuniarnermikkut  ajornartorsiortut aningaasanik naammattunik ikiorsiiffigineqannginnerat allallu Nunatsinnut attuumassuteqarsinnaasut naammattunik aningaasaliiffigineqannginneri isornartorsiorlugu.

Tamakku saniatigut Johan Lund Olsenip eqqartugaasa pingaaruteqartut ilagaat uranimut apeqqut.

- Uranisiorneq minnerunngitsumillu uranimit nunanut allanut tunisassiorsinnaanerput, tassami taanna tassaavoq nunanut allanut sillimaniarnermullu tunngassuteqarluartuusoq, tamannalu Qallunaat naalakkersuisuisa taama iskkoqartillugu nassuerutigisimammassuk nuannaarutigaara, tamannalu oqalugiarninni eqqaallugu.

Folketingimut ilaasortaq, Johan Lund Olsen, Inuit Ataqatigiit taama oqarpoq.